བོད་ཀྱི་སྲིད་སྐྱོང་མཆོག་རྒྱལ་སྤྱིའི་དབུ་ཁྲིད་ཀྱི་ལྷན་ཚོཌ་སུ་ཕེབས་གནང་བ།
ཐེངས་ 7540 བཀླགས་འདུག
སྲིད་སྐྱོང་བློ་བཟང་སེང་གེ་མཆོག་གིས་རྒྱལ་སྤྱིའི་དབུ་ཁྲིད་ཀྱི་ལྷན་ཚོགས་ཐེངས་ ༡༨ པའི་ཐོག་གསུང་བཤད་གནང་བ།
༄༅། །ཕྱི་ལོ་ ༢༠༡༤ ཟླ་ ༡༠ ཚེས་ ༡༢ ནས་ ༡༥ བར་ཅེཀ་སྤྱི་མཐུན་རྒྱལ་ཁབ་ Czech Republic ཀྱི་རྒྱལ་ས་པ་རཱག་ (Prague) ཏུ་ ༢༠༠༠ གླེང་སྟེགས་ (Forum 2000) ཞེས་པའི་རྒྱལ་སྤྱིའི་དབུ་ཁྲིད་ཀྱི་ལྷན་ཚོགས་ཐེངས་ ༡༨ པའི་ཐོག་རྒྱལ་ཁབ་འདྲ་མིན་ནས་ཆབ་སྲིད་དང་། ཤེས་ཡོན་ཅན། གསར་འགྱུར་བརྒྱུད་ལམ། ཚོང་ལས། ཆོས་ཕྱོགས་བཅས་ལས་རིགས་འདྲ་མིན་ཐོག་གི་དབུ་ཁྲིད་གྲངས་ ༢༠༠ ཙམ་མཉམ་ཞུགས་ཀྱིས་ལྷན་ཚོགས་སྐོང་འཚོགས་གནང་མུས་ལྟར། ཕྱི་ཚེས་ ༡༣ ཉིན་གྱི་སྔ་དྲོ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེང་གེ་མཆོག་གིས་ཅེཀ་སྤྱི་མཐུན་རྒྱལ་ཁབ་ཀྱི་སྲིད་འཛིན་དམ་པ་སྐུ་ཞབས་ཝ་སི་ལབ་ཧ་ཝེལ་མཆོག་གིས་ལམ་སྟོན་གནང་བའི་བཟང་སྤྱོད་ལ་གཞི་བཅོལ་བའི་ཕྱི་འབྲེལ་གྱི་སྲིད་བྱུས་ཀྱི་གལ་གནད། ཅེས་པའི་བརྗོད་གཞིའི་ཐོག་གསུང་བཤད་གནང་དོན།
དེ་རིང་ལྷན་ཚོགས་འདིའི་ཐོག་ཕེབས་པའི་རྣམ་པ་ལྷན་རྒྱས་ལ་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན། ང་ཚོས་སྲིད་འཛིན་དམ་པ་སྐུ་ཞབས་ཝ་སི་ལབ་ཧ་ཝེལ་མཆོག་གི་མཛད་རྗེས་དང་བརྩམས་ཆོས་ཁག་ལ་ཕྱིར་མིག་ཅི་བལྟས་ན། ཁོང་གིས་བཟང་སྤྱོད་དང་དཔལ་འབྱོར་གཉིས་ཀ་གལ་ཆེན་པོ་ཆགས་ཀྱི་ཡོད་ཀྱང་དཔལ་འབྱོར་ལས་བཟང་སྤྱོད་ཀྱི་རིན་ཐང་གལ་ཆེར་ངོས་འཛིན་གནང་ཡོད། ལྷག་པར་ཁོང་སྲིད་འཛིན་དུ་འཁོད་རྗེས་རྒྱལ་ཡོངས་ལ་ཐོག་མར་གསུང་བཤད་གནང་སྐབས། ༸གོང་ས་༸སྐྱབས་མགོན་ཆེན་པོ་མཆོག་དང་སྐབས་དེའི་ཡི་ཤུ་བླ་ཆེན་པོབ་མཆོག་གདན་འདྲེན་ཞུས་ཡོད་པར་བརྟེན། དམ་པ་ཁོང་གི་དགོངས་གཞི་ལས་བཟང་སྤྱོད་གལ་ཆེར་འཛིན་མཁན་ཞིག་ཡིན་པ་རྟོགས་ཐུབ། ཅེས་དང་། ལྷག་པར་སྲིད་སྐྱོང་མཆོག་གིས་བོད་མིའི་རང་ལུས་མེར་སྲེག་དང་འབྲེལ་བའི་སྐོར་གསུང་དོན། བོད་ཀྱི་བདེན་དོན་ཆེད་བོད་ནང་གི་བོད་མི་ ༡༣༢ ནས་རང་ལུས་མེར་སྲེག་བཏང་སྟེ་རྒྱ་ནག་གཞུང་ནས་བོད་མིའི་ཐོག་བཟུང་དང་འཛིན་བཞིན་པའི་དྲག་རྩུབ་ཀྱི་སྲིད་བྱུས་ལ་ཞི་རྒོལ་གནང་ཡོད། གལ་ཏེ་སྲིད་འཛིན་དམ་པ་ཁོང་སྐུ་འཚོ་གཞེས་བཞུགས་ཡོད་ན། བོད་ནང་གི་རྒྱལ་གཅེས་པ་ཁོང་རྣམ་པའི་མངོན་འདོད་ལ་རྒྱབ་སྐྱོར་གནང་སྲིད་པ་རེད། གང་ལ་ཞེ་ན། བོད་མི་རང་ལུས་མེར་སྲེག་གནང་མཁན་དེ་དག་ཀྱང་རང་དབང་འཐབ་རྩོད་གནང་མཁན་ཞིག་ཆགས་ཡོད། དེར་བརྟེན་ངས་རེ་འདུན་ཞུ་རྒྱུར། རྒྱལ་སྤྱིའི་གཞུང་དམངས་ཡོངས་ནས་བོད་མི་རང་ལུས་མེར་སྲེག་གནང་མཁན་ཚོའི་མངོན་འདོད་སྒྲུབ་ཆེད་བཟང་སྤྱོད་ཀྱི་རིན་ཐང་ལ་གལ་ཆེར་བཟུང་ནས་རྒྱབ་སྐྱོར་གནང་རོགས་ཞུ་རྒྱུ་ཡིན། དེ་བཞིན་སྲིད་འཛིན་དམ་པ་སྐུ་ཞབས་ཝ་སི་ལབ་ཧ་ཝེལ་མཆོག་གིས་ལམ་སྟོན་གནང་བའི་ལྟ་གྲུབ་བཟང་པོ་དེ་མི་རབས་ནས་མི་རབས་བར་རྒྱུན་འཁྱོངས་ཡོང་བའི་རེ་འདུན་ཞུ་བཞིན་ཡོད། ཅེས་སོགས་ཀྱི་གསུང་བཤད་གནང་འདུག དེ་རྗེས་གནམ་ཐང་དུ་སྲིད་སྐྱོང་མཆོག་གིས་ཅེཀ་གྲོས་ཚོགས་ཀྱི་འཐུས་མི་སྐུ་ཞབས་མ་རེཀ་བྷེན་ཌ་ (Mr Marek Benda) མཆོག་དང་ལྷན་མཇལ་འཕྲད་གནང་ཡོད། གཞན་ཡང་སྲིད་སྐྱོང་མཆོག་གིས་ཅེཀ་སྐད་ཡིག་ནང་ཡོད་པའི་དུས་དེབ་རེ་སི་པེཀ་ Respekt ཞེས་པ་དང་ཅེཀ་གསར་འགྱུར་ལས་ཁང་གི་ཆེད་དོན་དྲི་བར་ལན་འདེབས་གནང་འདུག ཕྱི་དྲོ་སྲིད་སྐྱོང་མཆོག་ནས་རིན་ཆེན་ལྷ་མོ་ལགས་ཀྱིས་རྩོམ་སྒྲིག་གནང་བའི་དཔེ་དེབ། ང་ཚོ་བོད་མི་ཚོ། “We Tibetans” ཞེས་པ་དབུ་འབྱེད་གནང་ཡོད། རིན་ཆེན་ལྷ་མོ་ལགས་ནི་ཅེཀ་སྤྱི་མཐུན་རྒྱལ་ཁབ་ཏུ་གནས་སྤོས་གནང་བའི་བོད་མི་ཞིག་ཡིན་འདུག དཔེ་དེབ་དབུ་འབྱེད་གྲུབ་བསྟུན་སྲིད་སྐྱོང་མཆོག་གིས་བོད་ཀྱི་སྐད་ཡིག་དང་ཆོས། བོད་མིའི་འཚོ་བའི་རྣམ་པ་བཅས་ཀྱི་སྐོར་གསུང་བཤད་གནང་རྗེས་ཅེཀ་བོད་དོན་རྒྱབ་སྐྱོར་ཚོགས་པས་ད་བར་བོད་དོན་ཆེད་ལྷག་བསམ་གཡོ་བ་མེད་པའི་ཐོག་ནས་རྒྱབ་སྐྱོར་གནང་བར་ཐུགས་རྗེ་ཆེ་གསུངས་པ་དང་སྦྲགས། ཡི་རང་བསྔགས་བརྗོད་ཀྱང་གནང་འདུག གནས་ཚུལ་ཡོང་ཁུངས་དབུས་བོད་མིའི་སྒྲིག་འཛུགས་ཀྱི་དྲ་གནས། ༢༠༡༤ ཟླ་ ༡༠ ཚེས་ ༡༤ རེས་གཟའ་མིག་དམར།
