ཧོང་ཀོང་མི་མང་གིས་རྒྱ་ནག་གཞུང་ལ་ཞི་བའི་ངོ་རྒོལ་བྱས་འདུག

ཐེངས་ 7489 བཀླགས་འདུག

ཧོང་ཀོང་མི་མང་གི་ལས་འགུལ༼པར༽༼བརྙན༽
ཕྱི་ཟླ་ ༩ ཚེས་ ༢༩ རེ་གཟའ་ཉི་མའི་ཉིན། ཧོང་ཀོང་ནང་སློབ་ཕྲུག་གཙོས་པའི་མི་མང་སྟོང་ཕྲག་མང་པོ་གཞུང་གི་ལས་ཁུངས་གཙོ་བོ་ཁག་གི་སྒོ་མདུན་དང་གཞུང་ལམ་ཆེ་ཁག་ཏུ་འདུ་འཛོམ་བྱས་ཏེ་ཞི་བའི་ངོ་རྒོལ་ལས་འགུལ་ཤུགས་ཆེན་སྤེལ་བཞིན་ཡོད་ཅིང་།

དེ་ནི་ལོ་རེ་བཞིན་ཧོང་ཀོང་ནང་རྒྱ་ནག་གི་ཤུགས་རྐྱེན་ཆེ་རུ་འགྲོ་བཞིན་ཡོད་པ་དང་། ལྷག་པར་དུ་ཉེ་ལམ་རྒྱ་ནག་གཞུང་གིས་ཧོང་ཀོང་ཐོག་འཛིན་པའི་སྲིད་བྱུས་སྐོར་གཡི་རྒྱབ་ཤ་དཀར་པོའི་དེབ་ཅེས་པ་ཞིག་ཁྱབ་བསྒྲགས་བྱས་ཡོད་པ་དང་། རྒྱ་ནག་མི་དམངས་འཐུས་མིའི་ཚོགས་ཆེན་སྟེང་ ༢༠༡༧ ལོའི་ཧོང་ཀོང་སྤྱི་ཁྱབ་འོས་འདེམས་སྐབས་རྒྱ་ནག་གཞུང་གིས་མིང་འདོན་བྱས་པའི་མི་སྣ་ལས་འོས་མིར་ཞུགས་མི་ཆོག་པའི་ཐག་གཅོད་བྱས་པ་སོགས་ཧོང་ཀོང་མི་མང་གི་རང་དབང་དང་དམངས་གཙོར་འགོག་རྐྱེན་ཆེན་པོ་བཟོ་བཞིན་ཡོད་སྟབས། བདུན་ཕྲག་འགའི་སྔོན་ནས་ཧོང་ཀོང་གི་མཐོ་སློབ་མང་པོ་ཞིག་གིས་སློབ་མཚམས་བཞག་སྟེ་ཞི་བའི་ངོ་རྒོལ་གནང་ཡོད་ཅིང། ཁ་སང་ཚེས་ ༢༧ དང་། དེ་རིང་ཚེས་ ༢༨ ཉིན་བཅས་སུ་ལས་འགུལ་ཤུགས་ཆེ་རུ་ཕྱིན་ཏེ། སློབ་ཕྲུག་སྟོང་ཕྲག་མང་པོ་དང་། དེ་བཞིན་བཟོ་བ་དང་མི་དམངས་དཀྱུས་མ་བཅས་མཉམ་ཞུགས་ཀྱིས་ཞི་བའི་ལས་འགུལ་གཞི་རྒྱ་ཆེ་རུ་འགྲོ་བཞིན་ཡོད་འདུག ཧོང་ཀོང་གཞུང་གི་ཉེན་རྟོག་པ་དང་དྲག་ཆས་དཔུང་དམག་གིས་མིག་ཆུ་འདོན་པའི་དུག་རླངས་སོགས་མང་ཚོགས་ཁྲོད་བེད་སྤྱོད་བཏང་སྟེ་ངོ་རྒོལ་ཞི་འཇགས་ཡོང་ཐབས་བྱེད་ཀྱིན་ཡོད་ཀྱང་། ངོ་རྒོལ་ལས་འགུལ་མུ་མཐུད་ཤུགས་ཆེ་རུ་འགྲོ་བཞིན་ཡོད་པ་མ་ཟད། ངོ་རྒོལ་ལས་འགུལ་ནང་ཞུགས་མཁན་མི་འབོར་ཡང་མང་དུ་འགྲོ་བཞིན་ཡོད་འདུག གནས་ཚུལ་ཡོང་ཁུངས་བོད་ཀྱི་དུས་བབ། འདོན་སྤེལ། ༢༠༡༤/༠༩/༢༩