སྤྲུལ་སྐུ་བསྟན་འཛིན་བདེ་ལེཌ་རིན་པོ་ཆེའི་གཟིམས་ཤག་དང་འབྲེལ་བའི་སྐོར།
ཐེངས་ 9489 བཀླགས་འདུག
༄༅།། སྤྲུལ་སྐུ་བསྟན་འཛིན་བདེ་ལེཌ་རིན་པོ་ཆེའི་གཟིམས་ཤག་དང་འབྲེལ་བའི་སྐོར།
གསར་འགོད་པའི་དཔྱད་གཞིའི་ཡིག་ཆ་དང་ཆབ་སྲིད་བཙོན་པ་ཡིན་ཟེར་མཁན་མི་ཉུང་བ་ཞིག་གིས་ལི་ཐང་གི་གསར་འགྱུར་སྐོར་སྐད་ཆ་ཡང་ཡང་དྲིས་པར་བརྟེན། ཡིག་ཆ་དེ་སྒེར་དོན་དུ་བེད་སྤྱོད་ལོག་པར་མི་གཏོང་བའི་རེ་བ་དང་བཅས་ཡོངས་གྲགས་བྱས་པ་ཡིན།
སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེའི་གཟིམས་ཤག་དེ་ནི། ཕྱི་ལོ་ ༡༩༩༠ ལོའི་དབྱར་ཁར་གསར་བརྒྱག་བྱས་པ་ཞིག་ཡིན། སྤྲུལ་རིན་པོ་ཆེ་མཆོག་ནི་དེང་སང་གི་བླ་སྤྲུལ་གཞན་དང་མི་འདྲ་བར་འདོད་ཆུང་ཆོག་ཤེས་ཁོ་ནས་བཞུགས་པ་དང་ཁོང་གི་རྒྱུན་ལྡན་དམིགས་ཡུལ་ནི། སྤྱིར་སངས་རྒྱས་ཀྱི་བསྟན་པ་དང་སེམས་ཅན་གྱི་བདེ་སྐྱིད་ཁོ་ནའི་ཆེད་དུ་ཡིན་པ་མ་ཟད། ལྷག་དོན་རྒྱ་ནག་གི་དྲང་པོ་མེད་པའི་སྲིད་ཇུས་འོག་ནས་ཉམས་ཐག་བོད་མི་དང་རྒྱ་མི། བོད་ཀྱི་རིག་གནས་དང་ཐོབ་ཐང་། འཚོ་བ་དང་མདུན་ལམ་བཅས་ཀྱི་ཆེད་དུ་ཡིན། ཐོག་མར་རིན་པོ་ཆེ་ཁོང་ནི་སློབ་མ་རྣམས་དང་འཚོ་བ་མཉམ་དུ་རོལ་ཏེ་གྲྭ་རྐྱང་དཀྱུས་མ་ལས་ཀྱང་ཧ་ཅང་འདོད་ཆུང་ཞི་དུལ་ངང་བཞུགས་ཡོད། དེ་རྗེས་ཕྱི་ལོ་ ༡༩༩༠ ལོའི་དབྱར་ཁར་རིན་པོ་ཆེའི་སློབ་མ་དང་དགོན་པའི་བླ་མ་ལས་གནས། སློབ་མའི་མང་ཚོགས་བཅས་ཀྱིས་འབད་པ་ལྷུར་བླངས་པའི་སྒོམ་ཁང་ཆུང་ཆུང་དེ། རིན་པོ་ཆེའི་གཟིགས་ཤག་གི་ངོ་བོར་གཏལ་འཁེལ་ལྟ་བུར་གྱུར་བ་རེད། གཟིམས་ཁང་དེ་ནི་ཕྱིའི་བཀོད་པ་དང་ནང་གི་སྒྲོམ་གཞི་སོགས་གང་ཅིར་གྲྭ་རྐྱང་དཀྱུས་མའི་ཤག་ལྟ་བུར་ཤིན་ཏུ་སྟབས་བདེ་གྲོན་ཆུང་གི་རང་བཞིན་དུ་གྱུར་ཡོད། གཟིམས་ཤག་དེ་ས་ཆའི་གནས་བབ་ཀྱི་ཆ་ནས། ཁམས་ནཱ་ལེནྜ་ཐེག་ཆེན་བྱང་ཆུབ་ཆོས་གླིང་ཞེས་པའི་དགོན་པའི་རྒྱབ་གནས་ལྷ་རྒྱལ་རིའི་རྩེ་མོ་དང་ཉེ་བའི་མདུན་ངོས། ཁྲ་ཆེན་ཐང་དཀར་མའི་འབྲོག་པའི་གྲོང་ཁྱེར་ནང་ཉི་ཟེར་མ་ཕོག་པའི་གོང་དུ། ནངས་སྔའི་ཉི་ཟེར་གྱིས་ཐོག་མར་མཆོད་པའི་མགྲོན་དུ་བཀུར་ཞིང་། མཁའ་རླུང་དང་ས་ཆུ་གཙང་བའི་གནས་ཁྱད་པར་ཅན་ཞིག་ཡིན།
ཕྱི་ལོ་ ༢༠༠༢ ལོའི་སྤྱི་ཟླ་ ༤ པའི་ཚེས་ ༧ ཉིན་སྤྲུལ་བསྟན་འཛིན་བདེ་ལེགས་རིན་པོ་ཆེ་མཆོག རྒྱ་གཞུང་གིས་ལྐོག་ཏུ་བཙན་བཟུང་བྱས་ཏེ་ལོ་ ༡༢ ཕྱིན་པའི་དུས་ཚོད་ནང་། དགོན་པ་དང་ས་གནས་མི་མང་ནས་ལྐོག་ལྐོག་ཞུམ་ཞུམ་ཁོ་ནས་ད་དབར་ཉམས་གསོ་ཆུང་ཚགས་ཐེངས་མང་བྱེད་མྱོང་། ད་ལོ་ཕྱི་ལོ་ ༢༠༡༤ ཕྱི་ཟླ་ ༦ ཚེས་ ༣ ནས་བཟུང་བསྐྱར་དུ་དགོན་པ་དང་ས་གནས་མང་ཚོགས་ནས་རྒྱ་གཞུང་གི་སྡིགས་སྐུལ་དང་རྣམ་འགྱུར་ལ་མ་ལྟོས་པར། ལོ་མང་རིང་རྒྱའི་བཙན་བཀའི་འོག་ཉམས་ཆག་ཆེན་པོར་ཕྱིན་པའི་སྤྲུལ་སྐུ་རིན་པོ་ཆེ་མཆོག་གི་གཟིམས་ཤག་ཉམས་གསོ་ཆ་ཚང་པ་ལྟབུ་བྱས་ཡོད།
ཧ་ལམ་ད་ཐེངས་གཟིམས་ཤག་ཉམས་གསོ་བྱས་པའི་རྗེས་སུ་དེ་དང་འབྲེལ་ཡོད་ཀྱི་བོད་མི་མི་ཉུང་བ་ཞིག་ལ་རྒྱའི་འདྲི་རྟོག་འོག་དཀའ་ངལ་འཕྲད་རྒྱུ་ཡིན་པར་མི་མང་པོས་ཚོད་དཔག་བྱེད་བཞིན་སྒང་རེད།
ཕྱི་ལོ་ ༢༠༡༤ ཕྱི་ཟླ་ ༦ ཚེས་ ༢ ནས་བཟུང་། སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེའི་གདན་ས། ཁམས་ནཱ་ལེནྜ་ཐེག་ཆེན་བྱང་ཆུབ་ཆོས་གླིང་དུ། མཁན་པོ་དང་མཁན་ཟུར། དགེ་བཤེས། བླ་སྤྲུལ། དགེ་བསྐོས། བོད་རིགས་འགོ་ཁྲིད། མི་མང་བཅས་ལྷན་འཛོམས་ཀྱིས། ༸སྐྱབས་རྗེ་བསྟན་འཛིན་བདེ་ལེགས་རིན་པོ་ཆེའི་ཞབས་རིམ་ཉིན་མང་པོར་གསོག་བསྒྲུབ་བྱེད་རྩིས་ཡོད་ཀྱང་ཉིན་གཅིག་མ་གཏོགས་འདོན་མ་བཅུག་པར་རྫོང་གི་འགོ་ཁྲིད་ནས་ཤང་གི་འགོ་ཁྲིད་ལ་ཁ་པར་བརྒྱབ་སྟེ་བཙན་བཀག་བྱས་འདུག ད་དུང་འབྲེལ་ཡོད་དགོན་པ་དང་ཡུལ་མི་གནད་ཡོད་མི་སྣ་མང་པོ་ཞིག་ལ་སྡིགས་ར་དང་བསྦྲགས། གནས་ལུགས་ཅི་ཡང་མ་བཤད་པར་གཤེ་གཤེ་མང་པོ་བཏང་འདུག
ས་གནས་དགེ་འདུན་པ་དང་མང་ཚོགས་རྣམས་སེམས་ཤུགས་སྔར་ལྷག་ཆེར་བསྐྱེད་ཀྱིས། དུས་རྒྱུན་ལྐོག་ནས་རིན་པོ་ཆེ་གཟིམ་ཤག་ཉམས་གསོ་ཅུང་ཟད་བྱེད་ཀྱིན་ཡོད་ཀྱང་། ད་ལན་ལོ་མང་རིང་རྒྱ་གཞུང་གི་བཙན་བཀའ་འོག་ཉམས་ཆག་ཆེན་པོར་ཕྱིན་པའི་སྤྲུལ་སྐུ་རིན་པོ་ཆེ་མཆོག་གི་གཟིམས་ཤག་ཉམས་གསོ་བྱེད་བཞིན་པའི་སྒང་རེད། དེར་རྒྱ་གཞུང་གིས་ངོ་ལྐོག་ཅི་རིགས་ནས་བཀག་འགོག་བྱ་རྒྱུར་སྔོན་དཔག་བྱེད་བཞིན་ཡོད་མོད། རྒྱ་གཞུང་གི་སྡིགས་ར་ལ་ཇི་མི་སྙམ་པར་མང་ཚོགས་ཀྱིས་བློ་གཏན་འགྱུར་མེད་ཀྱིས་གཟིམས་ཤག་བསྐྱར་གསོའི་ཨར་ལས་འགོ་བཙུགས་ཟིན་ཡོད་པ་དང་། ས་གནས་མང་ཚོགས་ཀྱིས་རིན་པོ་ཆེའི་གཟིམས་ཤག་བསྐྱར་གསོ་བྱས་ཏེ་རིན་པོ་ཆེེ་ཕེབས་རྒྱུར་རེ་བསྒུགས་ཆེན་པོ་བྱེད་བཞིན་ཡོད་པ་རེད།
ཕྱི་ལོ་ ༢༠༡༤ སྤྱི་ཟླ་ ༤ ཚེས་ ༢༨ ཉིན་གྱི་སྔ་དྲོར། ལི་ཐང་ཨོ་ཐོག་གི་མི་སྐྱ་ཨ་སྐལ་རྡོ་རྗེ། ངག་དབང་བློ་བཟང་། ཨ་ཕ་ནོར་བུ། བྱང་ཤར་ཀོམ་འབེ་བཅས་མི་གྲངས་བཞི། སྤྲུལ་སྐུ་བསྟན་འཛིན་བདེ་ལེགས་དང་འབྲེལ་བའི་ཞུ་སྐུལ་གྱི་ཡིག་ཆ་ཞིག རྫོང་དཔོན་བརྒྱུད་དེ་ཁུལ་དང་ཞིང་ཆེན། དབུས་སོགས་སུ་རིམ་པར་སྤྲོད་དུ་སོང་ཡང་། རྫོང་དུ་སླེབས་ལ་ཉེ་བའི་སར་ཉེན་རྟོག་པས་ལམ་བསྒུགས་རིམ་པ་མང་པོ་བྱས་ཏེ་ཁོང་མི་གྲངས་བཞི་པོ་འཇུ་བཟུང་བྱས་ནས། འདྲི་རྟོག་དང་འབྲེལ་བཙོན་ནག་ཏུ་བཅུག་པ་དང་། ཉིན་བདུན་གྱི་རྗེས་ཏེ། ༥ ཚེས་ ༤ ལ་ཕྱིར་གློད་ཡོད་པ་རེད། ཁོང་བཞི་ཡིས་མང་ཚོགས་ལ་སྐད་ཆ་འདྲ་མིན་བཤད་མི་ཆོག་པའི་ཐོག མཐའ་ན་བཙོན་ཁང་དུ་བཅུག་པའང་བཤད་མི་ཆོག་ཟེར། བླ་མ་གློད་གྲོལ་དགོས་ཟེར་བའི་མང་ཚོགས་ལ་ཁོང་ཚོས་སློབ་གསོ་སྤྲད་ཀྱི་ཡོད། ཁྱེད་ཚོས་སེམས་ཁྲལ་བྱེད་མི་དགོས་ཞེས་རྒྱ་ཡིས་བཤད་འདུག
དཀའ་ངལ་དེ་དག་གི་བརྒྱུད་རིམ་ནི།
ཕྱི་ལོ་ ༢༠༠༩ སྤྱི་ཟླ་ ༡༢ པའི་ཚེས་ ༠༥ ཡི་སྔོན་ནས་རིན་པོ་ཆེའི་ཞལ་སློབ་མི་གྲངས་བཞི་བཅུ་སྐོར་ཞིག་རིན་པོ་ཆེར་ཐུག་འཕྲད་དུ་བཅར་བ་འཇུ་བཟུང་བཀག་ཉར་བྱས། ཚེས་ལྔ་ཡི་ཕྱི་དྲོར་མགོ་ལོག་གི་ས་གནས་ཉི་ཤཱིས་ལུང་པའི་ཁར་བོད་མི་བདུན་བཅུ་སྐོར་གྱིས་ལམ་ཆེན་ཐོག་ཉལ་ནས་གོང་ཞུའི་རེ་འབོད་བྱས།
ཚེས་དྲུག་ཉིན། སྔ་དྲོར་ཞི་རྒོལ་བ་མི་གྲངས་དགུ་བཅུ་ལྷག་དགེ་བཤེས་ལུང་པ། ཞེས་པའི་ས་ཆ་དེར་མི་སྤྱོད་ལས་འདས་པའི་རྡུང་རྡེག་གནར་གཅོད་ཚད་ལས་བརྒལ་བ་བཏང་ཞིང་། དེའི་ཕྱི་དྲོར་ཨོ་ཐོག་ཧོ་ལུང་ཤཱང་གི་ཉེ་འགྲམ་གྱི་ལམ་ཆེན་སྟེང་ཞི་རྒོལ་བྱེད་མཁན་རྒན་ཁོག་ལོ་ན་༨༠ སྐོར་དང་། ཕྲུ་གུ་ལོོ་ན་བདུན་བརྒྱད་ཡས་མས་ཀྱིས་གྲུབ་པའི་མི་གྲངས་བཞི་བརྒྱ་ལྷག་གིས་མཚན་གང་རིང་ལག་གཉིས་ཐལ་མོ་སྦྱར་ཏེ། ཤཱང་ལ་རིན་པོ་ཆེ་གློད་གྲོལ་གྱི་རེ་བསྐུལ་ཞུས་ཡོད།
ཚེས་བདུན་དང་བརྒྱད་གཉིས། རིམ་བཞིན་གནས་ཚུལ་དེ་ཛ་དྲག་ཏུ་ཕྱིན་ཏེ། གཞུང་ལམ་བརྒྱུད་ནས་ཉག་ཆུང་རྫོང་དུ་ཞི་བའི་རེ་འབོད་ཆེད། རྒྱང་སྐྱོད་བྱེད་མཁན་གྱི་མི་ཚོགས་མང་དུ་སོང་ཡོད་ཅིང་། དམག་མིས་སྒོ་གང་ས་ནས་འགོག་ཐབས་བྱས་རུང་། ཞི་རྒོལ་བ་རྣམས་རིའི་མགོ་དང་ཤིང་ནགས་བརྒྱུད་དེ་ཤོར་སོང་བ་དང་། སྡེ་པ་དང་ལུང་པ་འདྲ་མིན་མང་པོ་ནས་ཡོང་བའི་ཧ་ཅང་གི་བོད་མི་ཕོན་ཆེན་ཉག་ཆུ་རྫོང་གི་མཐིལ་དུ་སླེབས་ཡོད་པ་དེ་ཚོ་ནི་ཕལ་ཆེར་ཕོ་གཞོན་མོ་གཞོན་རྐྱང་རྐྱང་ཡིན་སྟབས། དམག་མི་དང་ཉེན་རྟོག་པས་དྲག་རྡུང་གིས་རྐང་ལག་བཅག་པ་དང་ལམ་ཆེན་སྟེང་འཁྱིལ་བའི་མི་ཁྲག་རྣམས་རླངས་འཁོར་འཁྲུ་བྱེད་ཀྱི་ཆུས་ལམ་ཐོག་ཆུ་བཤལ་བཏང་དགོས་བྱུང་ཡོད། ཞི་རྒོལ་བ་ཚོའི་སྟོད་ཐུང་དང་དངུལ་ཁུག ལུས་ལ་ཡོད་པའི་གཡུ་བྱུ་རུ་ཆུང་ཚགས་ཡོད་རིགས་ཀྱང་བཅགས་ནས་གང་བྱུང་དུ་གཏོར་ཡོད་པ་རྣམས་རྒྱ་བོད་གཉིས་ཀའི་ཕྱོགས་ནས་དོ་སྣང་ཙམ་ཡང་བྱེད་ངེས་མི་འདུག་ཟེར། དེས་ནི་སྐབས་དེའི་ཛ་དྲག་གི་གནས་སྟངས་མཚོན་པ་ཡིན།
ཚེས་དགུ་ཉིན། རོབ་རྩིས་ལྟར་ན་དགེ་བཤེས་ལུང་པ་ཞེས་པར་ཞི་རྒོལ་བ་མི་གྲངས་དྲུག་བརྒྱ་ལྷག་ཡོད་པ་དང་། ཨོ་ཐོག་གི་ཧོ་ལུང་ཤཱང་དུ་བོད་མི་སུམ་བརྒྱ་ལྷག དེ་བཞིན་རྫོང་གི་ལྟེ་བར་ཞི་བའི་རེ་འབོད་བྱེད་མི་སྟོང་ཕྲག་ལྔ་ནས་དྲུག་གི་བར་དུ་རོབ་རྩིས་བྱེད་ཆོག ཚོང་ཁང་ཡོངས་རྫོགས་སྒོ་རྒྱབ་ནས་བོད་མི་ཞི་རྒོལ་བ་ཚོས་ཟས་མི་རག་པའི་ཐོག དྲག་དམག་གོས་ནག་ཅན་ཕོན་ཆེན་འབྱོར་ནས། ས་ཁུལ་གང་སར་རྒྱང་སྒྲགས་ཐོག་ནས་སྡིགས་ར་བསྐུལ། བོད་མི་ཚོས་ཆོད་སེམས་གཏན་པོའི་ཐོག་ནས་རིན་པོ་ཆེར་དྲང་བདེན་གྱི་ཐག་ཆོད་ཅིག་མ་ཡོང་བར་དུ་ཕྱིར་ལོག་བྱེད་ཀྱི་མིན་ཟེར།
ཕྱི་ལོ་༢༠༡༠ ཕྱི་ཟླ་ ༨ པའི་ཚེས་ ༡༢ ཉིན་གྱི་སྔ་དྲོ་ཆོུད་ ༡༡ གི་རྗེས་སུ་ལི་ཐང་མཐིལ་གྱི་གྲོང་ཁྱེར་ནང་ཁྲུང་ཁྲུང་དཀར་མོའི་ཁྲོམ་ར་ནས་འགོ་འཛུགས་ཀྱིས་ཚལ་ཁྲོམ་རའི་བར་དུ། ལི་ཐང་མཚན་ཉིད་གྲྭ་ཚང་གི་གྲྭ་པ་དང་ལི་ཐང་ཨོ་ཐོག་ནས་ཡིན་པའི་གྲྭ་ས་དམར་བློ་སྦོ་ཞེས་པ་ལོ་ ༢༡ ཅན་དང་། གྲྭ་སྐལ་བཟང་དགེ་འདུན་ཞེས་པ་ལོ་ ༡༦ ཅན་གཉིས་ཀྱིས་ལག་ཏུ་༸གོང་ས་མཆོག་གི་སྐུ་པར་མཐོང་གྲོལ་རིན་པོ་ཆེ་ཐོགས་ཏེ། རྒྱ་གཞུང་ལ་ངོ་རྒོལ་གྱི་སྐད་འབོད་བྱས་ཡོད།
ཕྱི་ལོ་ ༢༠༡༡ ལོའི་ཕྱི་ཟླ་ ༢ པའི་ཚེས་༡༤ དགོང་མོ་མཚན་གྱི་ཆུ་ཚོད་ ༡༠ བའི་ཐོག ལི་ཐང་གཡོན་རུ་ཧོར་རྙིང་སྡེ་བའི་གྲྭ་ཟུར་ཚེ་ཆོས་ལགས། ལི་ཐང་གི་ཧོར་རྙིང་འབྲོག་སྡེའི་བློ་ཟླ་ཚང་ཞེས་པའི་འབྲོག་པའི་ཁྱིམ་ཚང་ཞིག་ཏུ། རྒྱ་ནག་གི་དམག་མིས་ལྐོག་བཟུང་བཙན་འཁྲིད་བྱས་ཡོད།
ཕྱི་ལོ་ ༢༠༡༢ ཀྱི་ལོ་འགོར་ལི་ཐང་རྫོང་གི་རྫོང་དཔོན་གྱིས། ༢༠༡༢ ལོ་༨/༡ དམག་གི་དུས་ཆེན་སྲུང་བརྩི་དང་འབྲེལ་ལི་ཐང་རྟ་རྒྱུག་དུས་ཆེན་སྔར་ལྟར་སྐྱར་གསོ་བྱེད་ཀྱི་ཡིན། སྐབས་དེ་དུས་གནས་ཚུལ་བཟོ་ངེས་སུ་ཡོད་རུང་ས་ཆ་དེ་རང་དུ་རྩ་མེད་གཏོང་གི་ཡིན། ཀྲུང་དབྱང་ནས་ཀྱང་བཀའ་ཡོད་ཚུལ་གྱིས་སྡིགས་རའི་ཁྱབ་བསྒྲགས་ཤུགས་ཆེར་བྱས། དེར་བརྟེན། ༢༠༡༢ སྤྱི་ཟླ་ ༤ ཚེས་ ༢༠ རེ་གཟའ་སྤ་སངས་གི་དགོང་མོ། ལི་ཐང་རྫོང་གི་གྲོང་ཆེན་མཐིལ་དུ་བོད་དོན་སྐོར་གྱི་ཡིག་ཆ་ཤུགས་ཆེར་བཀྲམ་པ་དང་དམག་གིས་དམ་དྲག་ཤུགས་ཆེན་བྱེད་བཞིན་ཡོད་འདུག་ལ།
༢༠༡༣ ལོའི་སྤྱི་ཟླ་ ༢ ཚེས་ ༡༡ བོད་ལུགས་ལོ་སར་གྱི་གནམ་གང་དགོང་མོར། ལི་ཐང་ཨོ་ཐོག་སྨད་ཐལ་མའི་མི་མང་སྤྱི་ཁང་མེར་བསྲེགས་ཡོད་པ་དང་། སྤྱི་ཁང་དེ་ནི་གནས་དུས་དང་བསྟུན་ནས་རིག་གནས་འཆད་ཁྲིད་དང་མཎི་གསོག་བསྒྲུབ་སོགས་དང་། དུས་ཚིགས་ངེས་ཅན་ལ་བོད་ཀྱི་ཟློས་གར་ཁྲབ་ས་སོགས་བྱེད་ཀྱིན་ཡོད། དོན་དངོས་ནི། རྒྱ་གཞུང་འབྲེལ་ཡོད་པས་ལོ་སར་ཚེས་ ༡ ཉིན་ཆོས་ཕྱོགས་ཀྱི་མཛད་སྒོ་ཆེན་པོ་ཞིག་བྱེད་པར་དོགས་འདྲོགས་བྱས་པས་རྐྱེན་གྱིས་ཡིན་འདུག་པ་བཅས།
བོད་ཀྱི་རྒྱལ་ཡོངས་མང་གཙོ་ཚོགས་པའི་དབུས་སྤྱི་ཁྱབ་དྲུང་ཆེ་
སེར་སྨད་བློ་དགའ་ཡིན། ༢༠༡༤/༦/༦ ཉིན་སྤེལ།
བྲེལ་བས་ངང་བྲིས་པས་ཡིག་ནོར་ཡོང་སྲིད་ཀྱང་
དོན་ནོར་མེད་པར་ཁག་ཐེག་བྱེད།
