འདི་ནས་སྤེལ་བའི་རྒྱལ་ཡོངས་གསར་འགྱུར་ཕྱོཌ་བསྡུས་ལ་གཟིགས།
ཐེངས་ 7138 བཀླགས་འདུག
བོད་དོན་དང་འབྲེལ་བའི་གསར་འགྱུར། ཕྱི་ལོ་༢༠༡༩ ལོའི་༸གོང་ས་སྐྱབས་མགོན་ཆེན་པོ་མཆོག་གི་མཛད་འཆར་ཁག་རོབ་ཙམ་གཏན་འཁེལ་ཟིན་པ་ངོ་སྤྲོད་ཞུ་རྒྱུ་ཡིན།
ཕྱི་ཟླ་ ༢ པའི་ཚེས་ ༡༩ ཉིན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས། བཞུགས་སྒར་རྡ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ་སྐྱེས་རབས་གསུང་ཆོས་བཀའ་དྲིན་སྩལ་རྒྱུ་དང་། ཚེས་༢༠ ནས་ ༢༤ བར་ཉིན་གྲངས་བཞིའི་རིང་། དབུ་མ་སྙིང་པོའི་བཀའ་ཆོས། ཚེས་ ༢༧ ཉིན་ཚོགས་པ་ཁག་ཅིག་གིས་བརྟན་བཞུགས་འབུལ་རྒྱུ།
ཕྱི་ཟླ་ ༦ པའི་ཚེས་ ༥ ནས་ ༧ བར། ཉིན་གྲངས་གསུམ་རིང་། བོད་རིགས་གཞོན་སྐྱེས་རྣམས་ལ་བཀའ་ཆོས། ཕྱི་ཟླ་ ༦ ཚེས་ ༡༩ ཉིན་ཚོགས་པ་ཁག་གཉིས་ཀྱིས་བརྟན་བཞུགས་འབུལ་ལམ་ཞུ་རྒྱུ།
ཕྱི་ཟླ་ ༧ པའི་ཚེས་ ༦ ཉིན། རྡ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ་བོད་མིའི་སྒྲིག་འཛུགས་ཀྱི་ལས་བྱེད་ཟུར་པ་རྣམས་ནས་བརྟན་བཞུགས་བསྟར་འབུལ་ཞུ་རྒྱུ།
ཕྱི་ཟླ་ ༩ པའི་ཚེས་ ༣ ནས་ ༦ བར་ཉིན་བཞིའི་རིང་། རྡ་ས་ཐེག་ཆེན་ཆོས་གླིང་གཙུག་ལག་ཁང་དུ། དབུ་མ་རྩ་བའི་འགྲེལ་པ་བུདྡྷ་པཱ་ལི་ཏའི་གསུང་ཆོས་འཕྲོ་སྐྱོང་མཛད་རྒྱུ།
ཕྱི་ཟླ་ ༡༠ པའི་ཚེས་ ༢ ནས་ ༥ བར། རྡ་རམ་ས་ལར་ཉིན་གྲངས་བཞིའི་རིང་གསུང་ཆོས་བཀའ་དྲིན་སྩལ་རྒྱུ།
ཕྱི་ཟླ་༡༡ པའི་ཚེས་ ༤ ནས་ ༦ བར་བཞུགས་སྒར་རྡ་རམ་ས་ལར། ཉིན་གྲངས་གསུམ་རིང་བཀའ་ཆོས་གནང་རྒྱུ།
ཕྱི་ཟླ་ ༡༢ པའི་ཚེས་ ༢༨ ནས་ ༣༡ བར་གནས་མཆོག་རྡོ་རྗེ་གདན་དུ་སྤྱོད་འཇུག་ཆེན་མོའི་བཀའ་ཆོས། ཚེས་ ༣༠ ཉིན་གྱི་སྔ་དྲོ་སྤྱན་རས་གཟིགས་ཀྱི་བཀའ་དབང་། ཚེས་ ༣༡ ཉིན་གྱི་སྔ་དྲོ་བརྟན་བཞུགས་བསྟར་འབུལ་ཞུ་རྒྱུ་བཅས། ལོ་གཅིག་གི་མཛད་འཆར་ཁག་རོབ་ཙམ་གཏན་འཁེལ་ཟིན་ཡོད་པའི་གནས་ཚུལ་འདུག
བོད་ཀྱི་སྲོལ་རྒྱུན་ལོ་སར་མི་ཉམས་རྒྱུན་འཛིན་གྱི་ཆེད་དུ་བོད་ཕྱི་ནང་གཉིས་སུ། བོད་རྒྱལ་ལོ་ ༢༡༤༦ ལོའི་བོད་ཀྱི་ལོ་སར་སྲུང་བརྩི་ཟབ་རྒྱས་ཞུ་བཞིན་ཡོད་ནའང་། ཕྱོགས་གཅིག་ནས། བོད་ཀྱི་ལོ་རྒྱུས་ནང་གི་དཀའ་ངལ་ཆེ་ཤོས་མུ་ནག་གི་དུས་ཚོད་འདིར། བོད་ཀྱི་དཀའ་ངལ་ལ་གདོང་ལེན་བྱེད་པའི་ལས་འགུལ་སྣ་མང་ཞིག་སྤེལ་བཞིན་པའི་ཁྲོད་ནས། རྒྱལ་གཅེས་པ་བསྟན་པ་དར་རྒྱས་ལགས་ནས། བོད་གཞིས་བྱེས་མཉམ་འཛོམ་མ་བྱུང་ན། ངས་ལོ་མི་སར་ཟེར་བའི་དམ་བཅའ་བཞག་ནས། བོད་ཕྱི་ནང་གཉིས་སུ་བོད་དོན་ཆེད་དུ་རང་ལུས་མེར་བསྲེགས་གནང་མཁན་རྣམས་ལ་གདུང་སེམས་མཉམ་བསྐྱེད་མཚོན་ཆེད་དུ། བོད་དོན་དྲིལ་བསྒྲགས་ཀྱི་ལས་འགུལ་རླབས་ཆེ་བ་ཞིག་སྤེལ་བཞིན་པའི་བརྙན་ཐུང་ཞིག་གཤམ་དུ་གཟིགས་རོགས་གནོངས།
བོད་དོན་དྲིལ་བསྒྲགས་ཀྱི་ལས་འགུལ་དེར་བོད་མི་དང་བོད་དོན་རྒྱབ་སྐྱོར་བ་ཧ་ཅང་མང་པོས་དགའ་མོས་ཆེན་པོ་ཐོབ་ཡོད། རྒྱལ་གཅེས་བོད་དོན་ལས་འགུལ་བ་བསྟན་པ་དར་རྒྱས་མཆོག་ནི། བོད་ཨ་མདོ་མགོ་ལོག་ནས་འཚར་ལོངས་བྱུང་བ་མ་ཟད། རྒྱ་གར་ནང་ཤེས་རབ་དགའ་ཚལ་སློབ་གླིང་དང་། ས་རཱ་བོད་ཀྱི་མཐོ་སློབ་ནས་སློབ་གཉེར་གནང་སྟེ། བོད་དོན་ལས་འགུལ་སྣང་མང་ཁྲོད་མཉམ་ཞུགས་མཛད་མྱོང་ཡོད་པ་རེད།
བོད་ཀྱི་སྲིད་སྐྱོང་འབུམ་རམས་པ་མཁས་དབང་བློ་བཟང་སེངྒེ་མཆོག ལྷོ་ཨ་ཕི་རི་ཀའི་ནང་གཞུང་འབྲེལ་ཕྱོགས་ཕེབས་ཐེངས་གཉིས་པ་གནང་བཞིན་པ་མ་ཟད། ཐེངས་འདིར་དཔལ་ལྡན་སྲིད་སྐྱོང་མཆོག། ཁུལ་དེའི་མང་གཙོ་སྣ་སྦྲེལ་ཚོགས་པའི་སྐུ་མགྲོན་དུ་ཕེབས་ཏེ། ཕྱི་ཟླ་ ༢ ཚེས་ ༥ ནས་ ༩ བར་ཡུལ་དེའི་ཆབ་སྲིད་ཚོགས་པ་འདྲ་མིན་གྱི་གྲོས་ཚོགས་འཐུས་མིར་མཇལ་འཕྲད་གནང་རྒྱུ་དང་། བོད་དོན་རྒྱབ་སྐྱོར་གྱི་ནུས་ཤུགས་སྔར་བས་ཇེ་ཆེར་གཏོང་ཐབས། ལྷག་པར་ཤེས་ལྡན་མི་སྣ་དང་གསར་འགོད་པ། བོད་དོན་རྒྱབ་སྐྱོར་ཚོགས་པའི་ཚོགས་མི་བཅས་དང་མཇལ་འཕྲད་ཀྱིས་བོད་དོན་ཐོག་མུ་མཐུད་རྒྱབ་སྐྱོར་ཡོང་བའི་ཤུགས་སྣོན་མཛད་རྒྱུ་ཡིན་པ་རེད།
མདོ་ཁམས་ཀྱི་མཁས་དབང་རྟའུ་བློ་བཟང་དཔལ་ལྡན་ལགས་སྐུ་གཤེགས་པར། དཔལ་ལྡན་སྲིད་སྐྱོང་མཆོག་མཛད་བྲེལ་ཧ་ཅང་ཆེ་བའི་སྐབས་ཡིན་ནའང་། འདས་པོ་ཁོང་གི་ནང་མི་སྤུན་ཉེ་རྣམས་ལ་ངོ་དེབ་བརྒྱུད་ནས་ཐུགས་གསོའི་གསུང་འཕྲིན་གནང་སྟེ། ཡིད་སྐྱོའི་གནས་ཚུལ་བྱུང་བར་རང་རིགས་ཚང་མར་བློ་ཕམ་དང་གྱོང་གུད་ཆེན་པོ་ཡིན། ཞེས་བྲིས་གནང་སོང་། མཁས་དབང་རྟའུ་བློ་བཟང་དཔལ་ལྡན་མཆོག་ནི། ཆུང་དུས་ནས་པ་ལགས་ཀྱིས་ཁྲིད་ནས། སྤྱི་ལོ་༡༩༥༩ལོར་རྒྱ་གར་དུ་ཕེབས་ནས་སློབ་སྦྱོང་གནང་། དེའི་རྗེས་འཇར་མན་རྒྱལ་ཁབ་དུ་ཕེབས་ནས་སློབ་སྦྱོང་མཐར་ཕྱིན་པའི་རྗེས། ཁམས་རྟའུ་རྫོང་དུ་རྟ་བྲག་དྭ་ཕྲུག་ཁྱིམ་སྡེ། ཨ་མདོ་མགོ་ལོག་ས་ཁུལ་དུ་རྟ་བྲག་དྭ་ཕྲུག་ཁྱིམ་སྡེ་བཅས། དྭ་ཕྲུག་སློབ་གྲྭ་ཁག་གཉིས་བཙུགས་པ་མ་ཟད། གསོ་བ་རིག་པའི་མཁས་དབང་དང་བོད་གཞས་གསར་རྩོམ་པ་གྲགས་ཅན། བོད་དོན་ཐོག་ནུས་པ་ཧ་ཅང་ཆེ་བའི་རླབས་ཆེན་གྱི་མི་སྣ་ཞིག་ཡིན་པ་རེད།
རྒྱལ་སྤྱི་དང་འབྲེལ་བའི་གནས་ཚུལ། རྒྱ་ནག་ནང་ཏུ་རྟེན་གཞི་བྱས་པའི་ཕྱི་རྒྱལ་གསར་འགོད་མཐུན་ཚོགས་ཀྱིས་རྟོག་ཞིབ་སྙན་ཐོའི་ནང་། ཕྱི་རྒྱལ་གསར་འགོད་པ་བརྒྱ་ཆ་༥༥ གསར་འགོད་པའི་ལས་དོན་ཐོག་རྒྱ་ནག་གཞུང་གིས་གནོན་ཤུགས་སྤྲོད་རྒྱུ་དེ་ལོ་རེ་བཞིན་ཤུགས་ཆེ་རུ་ཕྱིན་པ་མ་ཟད། ཕྱི་ལོ་༢༠༡༡ ལོ་ནས་བཟུང་དམ་དྲག་ཆེ་རུ་ཕྱིན་ཡོད་པ་རེད།
ཕྱི་ཟླ་ ༢ ཚེས་ ༥ དགོང་མོར། ཨ་མི་རི་ཁའི་སྲིད་འཛིན་ཌོ་ནལ་ཊམ་གྱིས། རྒྱལ་ཡོངས་གྲོས་ཚོགས་གོང་འོག་གི་འཐུས་མི་ཚང་འཛོམས་སར་རྒྱལ་དོན་སྲི་ཞུ་སྙན་སྒྲོན་ཞུས་ཡོད་པ་མ་ཟད། སྲིད་འཛིན་ཌོ་ནལ་ཊམ་གྱིས། ཨ་མི་རི་ཀའི་ཕྱི་སྲིད་འཛིན་ཕྱོགས་ལ་གཏམ་བཤད་དེ་ཙམ་གསལ་བོ་ཞིག་གནང་མེད་ཀྱང་། རྒྱ་ནག་གི་དངོས་ཟོག་ལ་སྒོ་ཁྲལ་སྤར་རྒྱུ་ནི་འོས་ཤིང་འཚམས་པ་ཞིག་ཡིན་པའི་སྐོར་གསུངས་ཡོད་པ་རེད།
ཕྱི་ལོ་ ༢༠༡༩/༢/༤ ཉིན། ཨ་མི་རི་ཁའི་སྒྱུ་རྩལ་ཚོགས་པ་(Art 4 Peace) ཞེས་པས། རྒྱ་གར་གྱི་རྒྱལ་ས་ལྡི་རུ་མཛད་སྒོ་ཞིག་ཚོགས་ནས། ཚོགས་པ་དེས་བཙན་བྱོལ་བོད་མིའི་སྤྱི་ཚོགས་ལ་ལོ་འཁོར་གཟེངས་རྟགས་ཤིག་གནང་བར། ལྡི་ལི་བོད་ཀྱི་སྐུ་ཚབ་དོན་གཅོད་མཆོག་ནས་གཟེངས་རྟགས་དེ་བཞེས་གནང་བ་མ་ཟད། གཟེངས་རྟགས་མཛད་སྒོའི་སྟེང་འཛམ་གླིང་གི་རྒྱལ་ཁབ་མང་པོའི་མི་སྣ་དང་། གཞུང་ཚབ་པ། ཤེས་ཡོན་པ། སྒྱུ་རྩལ་བ་སོགས་ཕེབས་འདུག མཛད་སྒོའི་སྟེང་༧གོང་ས་སྐྱབས་མགོན་ཆེན་པོ་མཆོག་གི་བཀའ་སློབ་ཅིག་ཀྱང་སྒྲོག་སྦྱངས་གནང་ཡོད་པ་རེད།
གནམ་འོག་གི་གསར་འགྱུར་ཚན་པས་སྤེལ།
