མཚན་སྲུང་བ། ཞེས་པའི་དཔྱད་རྩོམ་དེ་འདིར་ཡོད། Copy
“མཚན་སྲུང་བ”
རྩོམ་པ་པོ། ཨ་ཚོགས་ཀླུ་མཁར་བྱམས།
བརྡ་བྱེད་ཀྱི་ལག་དམར་ཚོས༼མེལ་ཚེ་བ༽ ཞེས་པའི་གཟི་བརྗིད་ཅན་གྱི་མིང་ཚིག་འདི་སྲོག་ཐོག་ལ་བཏང་རྗེས། ཚབ་ལ་” ༼མཚན་སྲུང་བ༽ རྡོ་ཆག་བཙན་སྒྲིག་བྱས་པ་རེད། དམངས་གཙོ་བསད་ནས་མང་གཙོར་བསྒྱུར་མཁན་ཡང་ཁོ་ཚོ་རེད། — ཁ་བྱང་གི་འགྲེལ།
ས་རུབ་མཚམས། རྒྱུག་པ་འདོམ་གང་དྲུད་ནས་ལས་ཁུངས་ཁག་གི་སྲང་ཀྱོག་ཉུལ་མཁན་ཚོ་ནི། དབྱིན་སྐད་ལ( watchman ) ཡིན་ལ། རྒྱ་གར་སྐད་དུ་ཇཱོ་ཀེ་ཏཱ་ར་ཟེར། གངས་སྐྱིད་ཀྱི་སྐྱིད་སྡུག་ཁུངས
་ནས་གནས་རིམ་མཐའ་མ་ནི་ལས་ཀ་འདི་བྱེད་མཁན་དག་ཡིན་ལ། ཁོ་ཚོའི་མན་ཆོད་ན་ཁྱི་མ་གཏོགས་མེད། དེ་ལས་གཞན་རི་ངོགས་པ་ཚང་ལ་འབོལ་ཁྲིའི་སྟེང་ན། གཟིམས་ཆུང་སྦུག་ན། ལས་ཤོག་དང་ལས་ཐམ་ཙམ་དུ་མ་ཟད། སྲིད་ཞུ་བདེ་སྐྱིད་མའི་ཕྱག་མཚན་བསྣབས་པའི་མཚན་སྲུང་བ་གསར་བ་སྐོར་ཞིག་ཡོད། མཚན་སྲུང་བ་ཕྱི་མ་འདི་ཅན་པོའི་མགོ་ཐོག་ན་གནམ་མ་གཏོགས་མེད།
མཚན་སྲུང་བ་འདི་དག་གི་ལས་ཀ་ནི་མཚན་མོ་མེལ་ཚེ་བྱ་རྒྱུ་དེ་ཁོ་ན་མ་ཡིན་པར། རྒྱ་དམར་གཞུང་གི་དྲྭ་རྒྱའི་ཉིན་རྟོགས་པ་ཚོ་དང་ངོ་བོ་གཅིག་པ་འདྲ་ཞིག་ཡིན། རེད་ཏེ། སེམས་ཁྲལ་གྱི་ཆ་ནས་བཤད་ན་གནམ་སའི་ཁྱད་པར་ཡོད། འོན་ཀྱང་། ཁོ་ཚོས་མཚན་ཆེན་པོ་སྲུང་ཡ་མ་གཏོགས། མཚན་ཆུང་ཆུང་ཡིན་ན་མིག་ནང་ཁོ་རང་འཇོག་གི་མ་རེད
ལོས་བདེན་བསམ་བསམ་ཞིག་ལ། མཚན་སྲུང་བ་འདི་ཚོས་དྲྭ་ལམ་ཀྱི་རྒྱབ་བཤད་དམ། “ཟུར་ཟ”ཙམ་ཀྱིས་ཀྱང་མཚན་གནས་དེ་གནམ་ནས་ས་ལ་ཟེགས་ཆོག་ཆོག་ཡིན་པ་འདྲ་བོ་བཤད་དགའ་བོ་རེད། རི་བོང་གནམ་རྡིབས་ཀྱི་སེམས་ཁྲལ་ལབ་ན་དེ་འདྲ་ཞིག་ཡིན་འགྲོ
ངོ་མ་བཤད་ན། གོང་མ་འཇམ་པའི་དབྱངས་ཀྱི་གསེར་ཡིག་པས་བསྟོད་མྱོང་ས། རྒྱལ་མོ་ཡུམ་སྲས་གྱི་ཆོ་ལོའི་འདེགས་མྱོང་ས། ནོ་སྦེལ་ཞི་བདེ་བྱ་དགའ་བཞེས་མྱོང་མཁན། ད་དུང་ཨ་རིའི་གྲོས་ཚོགས་ཀྱི་རྟགས་མ། རྒྱ་ནག་གྲོས་ཚོགས་ཀྱི་ཚོགས་གཞོན་མཚན་གནས་ཡན་ཆོད་ཐོབ་མྱོང་མཁན། དེ་ལྟར་ལྷ་མི་གཉིས་ཀྱིས་བསྟད་ནས་དགུང་ལ་བཞག་ཡོད་པའི་མཚན་གནས་ཞིག ཚོད་གི་ཚོད་ལ་ས་ལ་ཟེགས་འགྲོ་བ་དེ་འདྲ་སྲིད་དོན་མེད།
མང་ཚོགས་ཀྱི་དྲི་བ་ནི། སོ་སོའི་སྒོ་གསུམ་ཀྱི་བྱ་སྤྱོད་རྒྱ་ཡན་ལ་ཤོར་ཡོད་མཁན། རང་གི་ཁ་ལག་གཉིས་ཀ་བདག་པོ་མི་ཐུབ་མཁན་རྐྱང་གིས། མཚན་གནས་དེ་འདྲ་ཆེན་པོ་ཞིག་ཇི་ལྟར་སྲུང་གི་ཡིན་ཟེར་བ་འདི་རེད། ཁྱེད་ཚོས་ངོ་མ་སྲུང་གི་ཡིན་ན། རྒྱ་ནད་ཁ་ཐུག་ལ་དྲི་མ་འཚུབ་འཚུབ་སྐུ་མདུན་སར་ཧོལ་འཛུལ་ཅིག་མ་གནང་རོགས། ཁ་དྲོ། ད་ནི་ཡར་ཞུ་དེ་དག་མེད་ནའང་འགྲིག་ས་རེད། སྲུང་བྱ་ཨ་མ་ནི་ཁྱེད་ཚོས་བདག་གཞན་གཉིས་ཀ་བཅའ་སུན་པོ་མི་བཟོ་རྒྱུ་དེ་རེད་ཟེར། དེ་ལྟར་ངུས་ནས་ཞུ་བ་འཐེན་མཁན་ཡང་འདུག
མཚན་སྲུང་བ་ཚོས་ཁོག་རྩིས་དང་། བྱེད་ཐབས་རང་འཇགས་ཡིན་མོད། ད་ཆ་ཁོ་ཚོའི་རིག་པ་གསལ་དུ་ཕྱིན་འདུག བཤད་སྟངས་ལ་ཅུང་འགྱུར་བ་བཏང་སོང་། ཆོས་དམག་རྒྱག་མཁན་ཚོས་བཤད་སྟངས་ལ་ལད་མོ་བྱེད་ཤེས་ཀྱིན་འདུག དཔེར་ན། ཁོ་ཚོས་མཚན་སྲུང་དགོས་དོན་ནི་མཚན་ཅན་གང་གི་ཆེད་མ་ཡིན་པར། དད་འབངས་ཀྱི་ཆེ་མཐོང་དང་། སེམས་ཚོར་སྲུང་སྐྱོབ་ཆེད་ཡིན་ཟེར།
དྲིན་ཅན་ཚོ། ཆེ་མཐོང་ནི་དད་ལྡན་པ་ཁོ་ནར་དབང་བ་ཞིག་མིན་ལ། དད་ལྡན་པ་དང་། དད་མེད་བ། ཆོས་མེད་པ་སོགས་ཀྱི་སེམས་ཀྱང་མི་སེམས་ཡིན་པ་འདྲ་འདྲ་རེད། ཁྱེད་ཚོས་སེམས་གཅིག་སྲུང་ནས་སེམས་གཅིག་གསོད་སྟངས་འདི་མང་ཉུང་གི་སྐད་ཆ་རེད་དམ། དཀོན་ཅོག་གི་བཀའ་ལུང་རེད། མཚན་ཅན་དེས་དགོངས་གཞི་ནི་ཡིན་དོགས་མེད།
མཚན་ལ་ནག་ཁུངས་ནང་འགྲོ་ཕོད་ན་ཕྲུ་གུ་དེ་ལ་བློ་ཁོག་ཡོད་པའི་ཁྱབ། མ་ཟད་མཚན་སྲུང་གི་ཕྱག་ལས་འདི་ཅན་པོ། ནག་པོ་དཀར་པོ་བཟོ་ཡ་དང་། འགྲོ་སོང་མེད་པར་དཔའ་མིང་ལེན་ས་ཞིག་ཡིན་ཙང་། ཁ་སང་དེ་རིང་གཞུང་སྒེར་གཉིས་ཀ ཚོགས་པ་སྐྱིད་སྡུག་ཁག་ཡིན་ཡིན་པའི་ཐོག་ལ། མི་སེར་དཀྱིལ་མའི་ནང་ནའང་མཚན་སྲུང་ལ་གཅིག་ཤོར་གཉིས་ཤོར་ཐོན་ཡོང་གི་འདུག མ་གཞི་མཚན་སྲུང་གི་མཐོ་རླབས་འོས་བསྡུའི་སྐབས་ལ་ཡིན་མོད། ད་ལོ་སྔ་སང་སང་སྔོན་བརྡ་སླེབས་འདུག
ཨ་ཞང་ཚང་གི་དམར་སྲུང་དམག་དང་སྦོ་ལུག་ཚང་གི་མཚན་སྲུང་བ་ཚོ་གཅིག་པ་རེད། ཁོ་ཚོར་ཅིག་སྲུང་རྒྱུ་ཞིག་མེད་ན་སྡོད་མི་ཚུགས་དོན་ག་རེ་མ་འགྲིག་པ་རེད། སྲུང་མཁན་ཚོ་རང་ཉིད་ལ་སྲུང་བྱ་རྐང་གཅིག་མི་དགོས་དོན་ག་རེ་རེད། “འཛིན་སྐྱོང་དང་འབྲེལ་བའི་བློ་དོགས་ཡོད་ན་བོད་མིའི་སྒྲིག་འཛུག་ལ་ཐད་གར་འདྲི་རོགས” གསུང་བ་བཞིན། དེ་རིང་ངའི་དྲི་བ་འདི་ཡིན།
མ་གཞི་ལོས་ཀྱང་ཤེས། གནམ་ནས་ས་ཁེབས་པའི་མཚན་དེ“ཟུར་ཟ”ཞིག་གིས་ས་ལ་ཟེགས་མི་འགྲོ་བ་མཚན་སྲུང་ཚོས་ཀྱང་ཤེས་ཡོད་ཟེར། ཤེས་ཡོད་ན་བཟང་གི ད་ཆ་མང་ཚོགས་ཀྱང་གཉིད་སད་ཡོང་གི་འདུག སད་ཀྱང་རན་འདུག བཀའ་དྲིན་ཁོ་ན་བསམ་མཁན་དང་། བཀའ་དྲིན་དྲན་མ་ཐག་སྤྱན་ཆབ་ཐོན་ཆོག་ཆོག་གི་མཚན་སྲུང་བ་འདི་ཚོས། གྲོད་པ་འཕུད་སྟངས་ཀྱང་ངོ་རྟགས་ཆོད་ཡོང་གི་འདུག
ཟུར་ཟ་ཙམ་དུ་མ་ཟད། ལ་ཕར་རྒྱབ་ན་ལས་རིམ་བང་སྒྲིག་སྟེ། མཚན་གནས་ཅན་དེ་དང་། དེ་ལ་རེ་བའི་མིག་འབུར་གཏོད་མཁན་གཉིས་ཀ་གསོན་པོར་ས་འོག་ལ་འཇུག་དང་འཇུག་བཞིན་པ་ནི། གོ་རིམ་ཅན་དང་། བརྒྱུན་མཐུད་ཅན། གཏན་འཇགས་ཅན་བཅས་རེད། བློ་ཕྱི་གཏོད་མི་བྱེད་མཁན་གྱི་མཚན་སྲུང་བ་གོ་ཆོད་ཅིག་ཡོད་ན། ད་ནི་ཁྱེད་ཅག་གི་ཁ་ཕྱི་ལ་ཕྱོགས་ནས་དཔའ་ངོམ་ས་དང་། “ཡོལ་བའི་རྒྱལ་གྱི་ངན་མཚང་བརྟོལ་” དུ་འཇུག་རྒྱུ་ག་ཚོད་དགོས་དགོས་འདུག མང་པོ་ཞིག་གིས། ལྷན་རྒྱས་ནས་དགོས་ངེས་ཀྱི་བྱེད་ཐབས་རྩོམ་རྒྱུར་བསྒུག་ནས་བསྡད་ཡོད།
དེ་ལས་ལྡོག་སྟེ། ཞི་མཐུན་མཉམ་གནས་ཀྱི་སྲིད་བྱུས་འཛིན་ས་དང་། གྲོས་མོལ་གྱི་སྒོ་མོ་ཕྱེས་ཕྱེས་ཡོད་ས་དེ་ཨ་ཞང་ཚང་ཡིན་དོན་ཅི་མ་འགྲིག་པ་རེད། བྱེད་སྟངས་ངོ་གཉིས་མ་འདིར“དགོངས་གཞིས”ལྷན་པ་བརྒྱབས་པའི་རྐྱེན་གྱིས། ཟུར་ཟ་ཙམ་ཡང་ཞུ་ཕོད་མཁན་མེད་ན་སྐྱིད་པ་ལ། ཁག་ཅིག་ངོ་མ་སྐོར་ལོག་འདུག
ཁ་འཁང་ར་ཡོད་མཁན་ལ་བཤད་ས་ཡོད་པ་ཞིག་དང་། བསམ་ཚུལ་མ་མཐུན་ན་སྐྱོན་བརྗོད་འགྲོ་ས་ཡོད་པ་ཞིག་བྱུང་ན། མཚན་གནས་ཅན། ཕྱག་སྟོང་སྤྱན་སྟོང་ཚང་ལ་དོན་གྱི་མཚན་བརྒྱན་དེ་མ་རེད་དམ། ཤཀྱཱ་ཐུབ་པས་ཀྱང་ང་ལ་བསྲེག་བཅད་བརྡར་གསུམ་བྱེད་རོགས་གསུང་མྱོང་བ་ཡོད།
ལྷ་དབང་མི་ལ་རྩིས་སྤྲད་ནས་ལོ་རྒན་བཅུ་འཁོར་ཟིན་འདུག ཁོང་ལ་བགྲེས་ཡོལ་ངལ་གསོ་ཙམ་ཡང་གནང་གི་མི་འཇུག་དོན་ཅི་རེད། པེ་ཅིན་ཡང་སྲིད་ལ་བྲེལ་བ་ཡོད་ན་མ་གཏོགས། མཚན་གནས་དེ་འདྲ་མི་འདྲ་བཅོ་བརྒྱད་ནང་ལ་དྲུད་ནས་ཡོང་རྒྱུའི་དུས་ཚིད་རེད་མི་འདུག མཚན་གནས་དང་། མཚན་ཅན་གཉིས་ཀ་སྲུང་བའི་ཟོལ་གྱིས་བསུབ་གི་ཡོད་ན་གང་ཤེས་མ་གཏོགས།
ཨ་ཁ་ཁ། གྲོད་པ་མཚན་སྲུང་སྒང་ནས་འཕུད་མཁན་ཚོར་མཚོན་ན། མཚན་དམོད་ཞུ་མཁན་ལོས་ཀྱང་དགོས། དེ་མེད་ན་ཁོ་ཚོར་ཚོང་མེད་ཙང་། ཅིག་ནས་༼ཟུར་ཟའི༽ ཚིག་འབྲུ་་གཅིག་རྙེད་སོང་ན། དེ་ལ་གསེར་རྟ་མགོ་འདྲ་ཞིག་གི་བརྩིས་ཐང་འདུག་ཟེར། མཚན་སྲུང་བ་འདི་ཚོ། མཚན་དམོད་བཙོང་ནས་གྲོད་ཁོག་འཕུད་ས། ལ་མོ་དེའི་ཕར་རྒྱབ་ན་ཡོད་ཚེ། ཡང་ཁོ་ཚོ་སྔ་བ་གསུམ་ཀྱི་སྔོན་མ་ཡིན་ནི་རེད། འདི་ཚོས་གནམ་སར་མི་ཤོངས་བའི་མཚན་དམོད་ཞུ་ཐག་ཆོད་ཞུ་གི་རེད། ང་མ་ཤི་གོང་ལ་མཐོང་ན་འདོད་པའི་བལྟན་མོ་ཡང་དེ་ག་ཙམ་ཡིན།།
