མདོ་ཁམས་ལི་ཐང་ནས་ཡིན་པའི་ཆབ་སྲིད་བཙོན་པ་ཞིག་གློད་གྲོལ་བཏང་བ།
ཐེངས་ 8049 བཀླགས་འདུག
མདོ་ཁམས་ལི་ཐང་གི་ཚུལ་ལྡན་དགེ་འདུན་པ་འཇམ་དབྱངས་བསྟན་འཛིན་ལགས། རྒྱ་ནག་གཞུང་གིས་ཆབ་སྲིད་ཀྱི་ཉེས་མིང་འོག་བཙོན་འཇུག་བྱས་ནས་ཡུན་རིང་ཕྱིན་ཡང་། ཕྱི་ལོ་ ༢༠༡༥ ཕྱི་ཟླ་ ༠༡ ཚེས་ ༢༤ ཉིན། གློ་བུར་བཙོན་གྲོལ་བཏང་བའི་གནས་ཚུལ་ཐོན་ཡོད་པ་རེད།
དེ་ཡང་དབུ་མའི་ལམ་མི་མང་ལས་འགུལ་ཁང་གི་འགན་འཛིན་ནས། གནམ་འོག་གི་གསར་འགྱུར་ཚན་པར་གནས་ཚུལ་མཁོ་སྤྲོད་གནང་བ་ལྟར་ན། ལི་ཐང་གཡོན་རུའི་འབྲོག་པ་ས་སྐོར་སྡེ་པ་ནས་ཡིན་པ་གྲྭ་འཇམ་དབྱངས་བསྟན་འཛིན་ལགས་ནི། ཕྱི་ལོ་ ༡༩༩༥ ལོར་རྒྱ་གར་དུ་སྐྱབས་བཅོལ་ལ་ཡོང་ནས་ཕྱི་ལོ་ ༢༠༠༤ ཕྱིར་བོད་དུ་ལོག་ཡོད། དེ་སྔ་རྒྱ་གར་ལྷོ་ཕྱོགས་དགའ་ལྡན་བྱང་རྩེ་རྡོ་རང་ཁང་ཚན་དུ་བསྡད་པའི་རིང་བསྡུས་གྲྭ་དང་རྣམ་འགྲེལ། ཕར་ཕྱིན། བརྡ་སྤྲོད་རིག་གནས་སོགས་སུ་སློབ་གཉེར་གནང་། ཕར་ཕྱིན་རབ་འབྱམས་པའི་མཚན་གནས་བཞེས་རྗེས་བོད་དུ་ཕེབས་ཏེ་ཕྱིར་རྒྱ་གར་དུ་ལོག་མ་ཐུབ་པ་རེད། བོད་དུ་ལོག་རྗེས་མང་ཚོགས་ལ་༸གོང་ས་མཆོག་གི་ཞབས་རིམ་གསོག་སྒྲུབ་དགོས་སྐོར་དང་། གཞན་ཡང་། མི་སེར་གྱི་བདེ་སྡུག་རྒྱལ་ཁབ་ཀྱི་གོང་རིམ་ལ་ཡར་ཞུ་བྱས་པ་སོགས་ཀྱིས་རྐྱེན་པས། ཕྱི་ལོ་ ༢༠༠༧ ལོའི་ཕྱི་ཟླ་ ༡༠ ཚེ་ ༣ ཉིན་ཁ་བྲལ་གྱི་ལས་འགུལ་སྤེལ་བའི་ཉེས་མིང་འོག་རྒྱ་ནག་གཞུང་གིས་ཁོང་འཛིན་བཟུང་བཙོན་འཇུག་བྱས། སྐབས་དེར་རྒྱལ་གཅེས་ཆོས་གཅེས་ཀྱི་ལས་འགུལ་ནང་དོན་ཚན་དྲུག་ཅན་གྱི་ཡིག་ཆ་ཞིག་བཀྲམས་པར་ཁོང་གིས་དེར་ངོས་ལེན་མེད་པའི་ལན་འདེབས་ཆ་ཚང་པ་ཞིག་གནང་། རྒྱ་གཞུང་ལ་ངོ་རྒོལ་སྐད་འབོད་དང་བསྦྲགས་༸རྒྱལ་བའི་ཞབས་བརྟན་གངས་རི་ར་བའི་ཞེས་པའི་ཤོལོ་ཀ་གཅིག་འུར་འདོན་གྱིས་ངོ་རྒོལ་རྒྱང་འབོད་ཤུགས་ཆེར་གནང་ཡོད། འོན་ཀྱང་། ཉིན་དེའི་ཕྱི་དྲོ་ཆོུད་ ༦ ཙམ་ལ་རྒྱའི་ཉེན་རྟོག་པའི་སྣུམ་འཁོར་གཉིས་ཡོང་ནས་ཁོང་འཇུ་བཟུང་བཙན་ཁྲིད་བྱས་ཡོད།
མི་ལོ་གསུམ་ལྷག་རིང་བཙོན་དུ་བཀག་ཉར་དང་སྡུག་སྦྱོང་མནར་གཅོད་ཚད་མེད་བཏང་བའི་རྐྱེན་གྱིས། ཁོང་གི་མཁལ་མ་དང་ཀླད་པར་གནོད་སྐྱོན་ཚབས་ཆེན་པོ་ཕོག་ཡོད་པར་བརྟེན། སྨན་བཅོས་རིམ་པར་བྱས་ནས་ཅུང་ཟད་དྲག་སྐྱེད་སོང་ཡོད་ན་ཡང་། ཁོང་ནི་དེ་སྔོན་རྒྱ་གར་དུ་མཚན་ཉིད་དང་བོད་ཀྱི་བརྡ་སྤྲོད་རིག་གནས་ལ་སྦྱང་བ་མི་དམན་པ་གནང་ཡོད་སྟབས། དུས་ཡུན་རིང་པོར་ཁུལ་དེའི་མང་ཚོགས་ནང་ཡིག་རྨོངས་སེལ་ཆེད་བོད་ཡིག་སློབ་པ་སོགས་བོད་ཀྱི་རིག་གནས་གོང་སྤེལ་སླད་ལས་འགུལ་མང་པོ་སྤེལ་བ་རེད། ཕྱི་ལོ་ ༢༠༡༢ ཕྱི་ཟླ་ ༨ པའི་ནང་ལི་ཐང་དགོན་པའི་ཟླ་ཆོས་ཚོགས་པའི་སྐབས་ལ། རྒྱ་ནག་གི་ཉེན་རྟོག་པས་ཁོང་བསྐྱར་དུ་གསང་བའི་སྒོ་ནས་ནང་མི་དང་གཉེན་ཉེ་སོགས་འབྲེལ་ཡོད་སུས་ཀྱང་གོ་ཚོར་མེད་པར་བཙན་ཁྲིད་བྱས་ཏེ། ནག་ཉེས་འདི་ཡིན་འདི་མིན་གྱི་སྐད་ཆ་གང་ཡང་མེད་ནའང་རྒྱ་གཞུང་གིས་ཁོང་ལ་ལོ་གསུམ་དང་ཟླ་བ་དྲུག་གི་ཁྲིམས་ཆད་དྲིལ་བསྒྲགས་བྱས་པ་རེད། གློ་བུར་དུ་སང་ཉིན་གྲྭ་འཇམ་དབྱངས་བསྟན་འཛིན་གློད་གྲོལ་གཏོང་གི་ཡིན་ཞེས་སྔོ་བརྡ་འབྱོར་བ་མ་གཏོགས་ཁྲིམས་ཆད་དུས་ཡུན་སོགས་གནས་ཚུལ་མང་པོའི་ཐོག་ནས་ས་གནས་མི་མང་གིས་ཁོང་གློ་བུར་གློད་གྲོལ་གཏོང་རྒྱུའི་གནས་ཚུལ་གང་ཡང་གོ་མེད་པ་རེད། དེའང་ཕྱི་ལོ་ ༢༠༡༥ ཟླ་བ་ ༠༡ ཚེས་ ༢༤ ཉིན་དགེ་འདུན་པ་ཁོང་མི་ཉག་ར་ལྔ་ཁའི་བཙོན་ཁང་ཞིག་ནས་གློད་གྲོལ་བཏང་བ་དང་། དུས་ཡུན་ཐུང་ངུའི་ནང་ཕ་ཡུལ་ལི་ཐང་མི་མང་གིས་ཕེབས་བསུ་གྲ་སྒྲིག་གིས་ད་ལྟ་ཁོང་རང་གི་ནང་དུ་འབྱོར་ཡོད་པ་རེད། ཁོང་གི་སྐུ་གཟུགས་བདེ་ཐང་ཐད་ཀྱི་གནས་ཚུལ་ཞིབ་ཕྲ་ད་དུང་གསལ་པོ་ཤེས་མེད་ཅིང་། ཁོང་ད་ལྟ་དགུང་གྲངས་༤༡ ཡིན་པ་དང་མདོ་ཁམས་ལི་ཐང་དགོན་ཆེན་གྱི་གྲྭ་པ་ཡིན། ཁོང་གི་ཕ་མིང་ལ་འཕྲིན་ལས་ཚེ་རིང་ཟེར་གྱི་ཡོད་པ་རེད། མི་ལོ་མང་པོ་མཉམ་དུ་གཤིབས་པའི་འཛིན་གྲྭ་གྲོགས་སྤྲུལ་སྐུ་མཁས་མཆོག་ནས་འགྲེལ་བརྗོད་གནང་བར་གཞིག་ན། ཁོང་ནི་དུས་རྒྱུན་དུ་དྲང་པོ་དྲང་བཞག་ལ་ཧ་ཅང་དགའ་པོ་གནང་མཁན་ཞིག་དང་མ་དྲང་པ་དང་མི་ཐད་པའི་གནས་ཚུལ་ཅི་བྱུང་ཡང་ཐད་ཀར་གདོང་ལན་གནང་དགོས་མཁན་ཞིག་རེད། གྲྭ་པ་ཚུལ་མཐུན་ཡིན་པའི་ཐོག་མི་ལྷག་བསམ་ཅན་དང་སྤྱི་སེམས་ཅན། མི་ཉམ་ཐག་ལ་རོགས་རམ་བྱ་རྒྱུར་དགའ་མོས་ཆེན་པོ་ཡོད་པ་སོགས་གཞན་དང་མི་འདྲ་བ་ཞིག་ཡོད་རེད། ཅེས་ངོ་སྤྲོད་གནང་སོང་། གནམ་འོག་གི་གསར་འགྱུར་རྩོམ་སྒྲིག་པས།
