བོད་རིཌ་སློབ་མ་གསུམ་དམར་གསོད་བཏང་བའི་གནས་ཚུལ་ཐོན་འདུག

ཐེངས་ 35135 བཀླགས་འདུག

ཕྱི་ཟླ་ ༩ ཚེས་ ༢༥ ཉིན་དཀར་མཛེས་ཁུལ་ལྕགས་ཟམ་རྫོང་དུ་སློབ་ཆེན་ནས་མཐར་ཕྱིན་པའི་བོད་རིགས་སློབ་མ་བུ་མོ་ ༤ ལ་ཆེད་མངགས་རླངས་འཁོར་གྱིས་བརྡུངས་ཏེ་སློབ་མ་ ༣ བསད་ཡོད་སྟབས། འདས་པོའི་ཁྱིམ་མི་སོགས་ཀྱིས་སྲིད་གཞུང་གིས་དྲང་བདེན་སྐྱོང་དགོས་པའི་ཞུ་སྐུལ་བྱེད་བཞིན་འདུག སློབ་མ་བཞི་ནི་རྒྱལ་རོང་ནས་ཡིན་པ་དང་དེའང་རོང་བྲག་རྫོང་ (བསྟན་པ་ཤང་) ཟེར་བ་དེ་ནས་ཡིན་པ་རེད།

དེ་ཡང་ཟླ་འདིའི་ཕྱི་ཚེས་ ༢༥ ཉིན། རྒྱལ་མོ་ཚ་བ་རོང་ནས་ཡིན་པའི་བོད་རིགས་སློབ་མ་ ༤ དཀར་མཛེས་ཁུལ་ལྕགས་ཟམ་རྫོང་དུ་གཞུང་ཞབས་པར་ཚུད་རྒྱུགས་སྤྲོད་དུ་ཕྱིན་ཏེ། ལྕགས་ཟམ་རྫོང་གི་ཟ་ཁང་ཅན་གྱི་མགྲོན་ཁང་ཞིག་ཏུ་བསྡད་ནས་ཟ་མ་ཟོས་པ་དང་། དང་ཐོག་ནས་ཟས་རིན་ཐད་སྐད་ཆ་གསལ་བོ་བཤད་ཡོད་ཀྱང་རྗེས་སུ་སྒོར་མོ་སྤྲོད་སྐབས། ཟས་རིན་ལྡབ་ལོག་གིས་ཆེན་པོ་སྤྲོད་དགོས་ཚུལ་བཤད་ཡོད་སྟབས། སློབ་མ་དེ་དག་གིས་ཁྱེད་ཚོས་ཟས་རིན་ཙམ་གྱི་ཐོག་ནས་མ་དྲང་པ་དེ་འདྲ་བྱེད་ན། ད་དུང་སང་ཉིན་མགྲོན་ཁང་གི་གོང་ཚད་ཀྱང་ལྡབ་ལོག་ཁྱེར་ཤོར་ཟེར་རྒྱུར་གཏན་འཁེལ་བ་རེད། ང་ཚོ་ལ་དངུལ་མེད། ང་ཚོ་མགྲོན་ཁང་འདིར་སྡོད་ཀྱི་མིན། ཞེས་བཤད་དེ་ཕྱིར་ལོག་ཡོང་སྐབས། སྐར་མ་ཉི་ཤུ་ཙམ་གྱི་རྗེས་ནས་མགྲོན་ཁང་གི་བདག་པོའི་བུ་ཡིས་སྣུམ་འཁོར་ཞིག་བཏང་ནས་རྗེས་འདེད་བྱས་ཏེ། སློབ་མ་རྣམས་སྐྱོད་བཞིན་པའི་རླངས་འཁོར་དེའི་རྒྱབ་ནས་སྣུམ་འཁོར་གྱིས་ཤུགས་ཀྱིས་བརྡུངས་ནས་སློབ་མ་ ༣ བསད་པ་དང་གཅིག་ལ་རྨས་སྐྱོན་ཚབས་ཆེན་བཟོས་ཡོད་པ་རེད། ཡིན་ནའང་། ད་ལྟའི་ཆར་རྨས་སྐྱོན་ཕོག་པའི་སློབ་མ་དེ་ས་གནས་ཀྱི་སྨན་ཁང་ ༣༦༣ རྟགས་ཅན་གྱི་སྨན་ཁང་ཞིག་ཏུ་སྐྱེལ་ཡོད་ཟེར་བ་ཙམ་ལས་ཞིབ་ཕྲའི་གནས་ཚུལ་ཤེས་རྟོགས་ཐུབ་ཀྱི་མེད་པ་རེད།

སྐབས་དེར་རླངས་འཁོར་གཏོང་མཁན་དེས་སློབ་མ་ཚང་མ་གསོད་རྩིས་བྱས་ཡོད་ཀྱང་འཆར་གཞི་དེ་ལམ་ལྷོང་བྱུང་མེད་པ་དང་། མགྲོན་ཁང་གི་བདག་པོ་དེ་ནག་ཚོགས་ཀྱི་རྒྱུ་སྟོབས་དང་དབང་ཤུགས་ཡོད་པའི་མི་ཚང་ཞིག་ཡིན་སྟབས། དོན་རྐྱེན་བྱུང་རྗེས་ཉེན་རྟོག་པ་དོན་རྐྱེན་བྱུང་སའི་ས་གནས་ལ་དངོས་སུ་བསླེབས་ནས་ཞིབ་བཤེར་བྱས་ཡོད་ཀྱང་། ཉེན་རྟོག་པ་དང་མགྲོན་ཁང་གི་བདག་པོ་གཉིས་ཁ་མཐུན་བྱས་ཏེ། རྨས་སྐྱོན་ཕོག་པའི་སློབ་མ་དེས་བཤད་པའི་སྐད་ཆ་དང་རྩ་བ་ནས་མི་མཐུན་པའི་གནད་དོན་འགྲེལ་བཤད་བྱས་པར་བརྟེན། ཕྱི་ཚེས་ ༢༩ ཉིན་འདས་པོའི་ཁྱིམ་མི་དང་སློབ་གྲོགས་སོགས་འབྲེལ་ཡོད་ལས་ཁུངས་ཀྱི་སྒོ་ཁར་འདུ་འཛོམས་ཀྱིས་ལག་ཏུ་འདས་པོ་ཚོའི་འདྲ་པར་བཟུང་སྟེ། སྲིད་གཞུང་གིས་གནོད་སྐྱོན་ཐེབས་མཁན་ལ་དྲང་བདེན་ཞིག་སྐྱོང་བའི་ཡིད་ཆེས་ཡོད་ཅེས་པའི་རྒྱ་ཡིག་གི་འབོད་ཚིག་བཟུང་སྟེ་རེ་སྐུལ་དང་ཞི་བའི་འབོད་ཚིག་བསྒྲགས་ཡོད་པ་མ་ཟད། པུས་མོ་ས་ལ་བཙུགས་ཏེ་ལག་གཉིས་ཐལ་མོ་སྦྱར་ནས་ངུ་འབོད་བྱེད་བཞིན་ཡོད་འདུག

ཟླ་འདིའི་ཕྱི་ཚེས་ ༢༦ ཉིན་གྱི་སྔ་དྲོར། དོན་རྐྱེན་དེའི་ཐད་ལྕགས་ཟམ་རྫོང་ཉེན་རྟོག་ཁང་གིས། ཐོག་རྩེགས་གཉིས་པའི་ཚོགས་ཁང་དུ་ཚོགས་འདུ་ཞིག་བསྡུས་པའི་ཐོག ས་གནས་ཉེན་རྟོག་པའི་ཞིབ་བཤེར་སྙན་ཐོ་དང་སྣུམ་འཁོར་གྱིས་བརྡུང་སའི་ཡུལ་དངོས་ཀྱི་གནས་ཚུལ་བར་མི་འདྲ་བའི་བར་ཁྱད་ཆེན་པོ་མང་པོ་བྱུང་ཡོད་འདུག ཚོགས་འདུ་དེའི་ནང་བོད་པ་མང་པོ་འདུག་ཟེར། འདས་པོའི་ཁྱིམ་མིས་དོན་རྐྱེན་བྱུང་སྐབས་ཁ་ལོ་བ་དང་མཉམ་དུ་མི་གཞན་ཡོད་མེད་འདྲི་སྐབས། ཉེན་རྟོག་པས་མི་གཞན་མེད་པར་བརྗོད་ཡོད་ཀྱང་། རྨས་སྐྱོན་ཕོག་པའི་སློབ་མ་དེས་དོན་རྐྱེན་བྱུང་སྐབས་ཁ་ལོ་བའི་མཉམ་དུ་མི་གཞན་ཡོད་ལུགས་བརྗོད་ཡོད་པ་དང་། ཡང་། དོན་རྐྱེན་བྱུང་སྐབས་ཁྱིམ་མིར་མོས་མཐུན་ཡོད་མེད་མ་དྲིས་པར་ཕུང་པོ་རྣམས་དར་རྩེ་མདོའི་ཕུང་པོ་མེར་བསྲེག་གཏོང་སར་ཅིའི་ཕྱིར་ཁྱེར་བ་ཡིན་དྲིས་པར། ཉེན་རྟོག་པས་འགྲིམ་འགྲུལ་ལ་ཤུགས་རྐྱེན་མི་བཟོ་བའི་ཆེད་དུ་ཡིན་སྐོར་ཙམ་ལས་འགྲེལ་བཤད་མེད་པ་རེད། དེ་བཞིན། དོན་རྐྱེན་བྱུང་སྐབས་བུ་མོ་བཞི་ཁ་ཕྱོགས་གང་དུ་འགྲོ་བཞིན་ཡོད་མེད་སོགས་ཀྱི་ཐད་ལའང་མ་མཐུན་པ་མང་པོ་བྱུང་ཡོད་འདུག བུ་མོ་གཅིག་མར་ཐོན་ནས་གྱང་གི་སྒང་ལ་འཛེག་ཐབས་བྱས་ཀྱང་ད་དུང་ཁོ་པས་སྣུམ་འཁོར་གྱི་བརྡུང་ཐབས་བྱས་ཀྱང་ས་ཆའི་གནས་བབ་ཀྱིས་སྟབས་བདེ་པོ་བྱུང་མི་འདུག དེ་ནས་དྲག་ལས་པས་སྣུམ་འཁོར་བཏང་ནས་བྲོས་སོང་བ་དང་། ལྕགས་ཟམ་གྱི་སྤྱི་བདེ་ཉེན་རྟོག་པས་སློབ་མ་གསུམ་གྱི་ཕུང་པོ་རྣམས་ནས་ཁྲག་དཀྲུས་ཏེ་རོ་བསྲེག་ཁང་དུ་བསྐྱེལ་འདུག དོན་རྐྱེན་བྱུང་སའི་ཁྲག་དཀྲུག་ནས་གཙང་མ་ཡོང་ཐབས་བྱས་འདུག་ཀྱང་། ལམ་ཟུར་གྱི་རྡོ་ངོས་སུ་ལག་པ་ལ་ཁྲག་ཡོད་པའི་སྤར་བའི་རྗེས་དོད་ཡོད་པ་རེད། དེར་ཉེན་རྟོག་པས་ཁོང་ཚོ་ཡིན་ཚུལ་བརྗོད་འདུག ཡང་། མི་བསད་སྣུམ་འཁོར་གྱི་ཁ་ལོ་བ་ཉེན་རྟོག་པས་འཇུ་བཟུང་བྱེད་ཡོད་མེད་དང་ཁོ་པའི་རོགས་པ་འཇུས་ནས་དོ་བདག་འཇུས་མེད་པའི་སྐོར་སོགས་སྐད་ཆ་ཐོ་མི་ཐུག་པ་མང་པོ་འདུག འོན་ཀྱང་། རྒྱ་ནག་གི་དྲ་བའི་ནང་། རུས་མིང་ཏྲང་། རུས་མིང་ལེའུ། རུས་མིང་ཡཱང་། རུས་མིང་ཧུའུ་བཅས་རེད། རུས་མིང་ཧུའུ་ཟེར་བ་ཚེས་ ༢༧ ཉིན་ ༣༦༣ སྨན་ཁང་དུ་སྨན་བཅོས་ཆེད་བསྐྱེལ་ཡོད་ཟེར་བ་སོགས་ལས་གནས་ཚུལ་ཞིབ་ཚགས་བཀོད་མེད་པ་རེད།

གནས་ཚུལ་དེའི་སྐོར་བོད་ཀྱི་བང་ཆེན་དྲ་བའི་ནང་། ཟླ་ ༩ ཚེས ༣༠ སྔ་དྲོ་ཆོུད་ ༡༠:༥༩ ཐོག་གནས་ཚུལ་སྤེལ་བ་ལྟར་ན། དཀར་མཛེས་ཁུལ་ལྕགས་ཟམ་རྫོང་དུ་བོད་རིགས་སློབ་མ་བཞི་ལ་རླངས་འཁོར་གྱིས་བརྡུང་མཁན་རྒྱ་མི་ཞིག་ཡིན་པ་དང་། ངོ་རྒོལ་ནང་ཞུགས་མཁན་ནི། སློབ་མ་ཚོའི་ནང་མི་དང་སློབ་གྲོགས་མང་པོ་ཞིག་རེད་ཟེར། སློབ་མ་ཚོ་རོང་བྲག་རྫོང་ནས་ཡིན་པ་དང་། བརྒྱུད་ལམ་ཁག་ཅིག་གི་ནང་གནས་ཚུལ་སྤེལ་བར་ཁུངས་བྱས་ཏེ། བུ་མོ་རྨས་མ་དེ་ཡང་སྨན་བཅོས་མ་ཐུབ་པར་སྨན་ཁང་ནས་འདས་གྲོངས་སུ་སོང་ཡོད་པ་དང་། རྒྱ་ནག་གི་གཞུང་འབྲེལ་གསར་འགྱུར་ཁུངས་བྱས་ནས། སློབ་མ་དམར་གསོད་གཏང་བའི་དུས་ཚོད་ནི། ཚེས་༢༥ ཉིན་གྱི་དགོང་མོའི་ཆུ་ཚོད་དགུ་དང་སྐར་མ་ཉི་ཤུ་ཡས་མས་ཤིག་ཡིན་པར་བསྟན་ཡོད་པ་རེད།