བོད་ནང་དུ་བློ་ཕམ་གྱི་མྱོང་ཚོར་ཡི་གེ་ཞིག་སྤྲིངས་པ།

༄༅།། རླབས་ཆེན་རྣམ་དཔྱོད་ཀྱིས་ཡོངས་སུ་ཕྱུག་པའི་གཞིས་བཞུགས་བོད་རིགས་སྤུན་ཟླ་ཡོངས་ཀྱི་སྙན་ལམ་དུ་ཆེད་གསོལ།

ཁྱེད་རྣམ་པར་མཛའ་སེམས་གུས་པས་འཚམས་འདྲི་དང་སྐུ་གཟུགས་ཁམས་དྭངས་ཡོང་བའི་སྨོན་འདུན་ཞུ་བཞིན་ཡོད།

ཨ་རིའི་ནང་ད་ལྟ་སྔ་པོ་རེད། ང་གསར་འགོད་པ་ཉག་ཆུ་སྔོན་མོ་ཡིན། སྤྱི་ཚོགས་ཀྱི་སྡིངས་ཆེའི་སྟེང་སྤྱི་པའི་ཞབས་ཕྱི་མི་ལོ་ ༡༥ ལྷག་ཞུས་ཚར། ཞོགས་ཇ་འཐུང་ཞོར། སྒྱུ་རྩལ་གྱིས་ཡོངས་སུ་ཕྱུག་པའི་བོད་ནང་གི་ཁམས་གཞས་འདི་ལ་ལྟ་ཉན་བྱས་པ་ཡིན། སྤུན་ཟླ་ཁྱེད་རྣམ་པའི་མཐུན་འབྲེལ་གྱི་རྣམ་འགྱུར་ནི་ཁ་ཞེ་གཉིས་མེད་ཅིག་རེད། རྗེས་སུ་ཡི་རངས་ཡོད། བཀའ་དྲིན་ཆེ། བོད་སྟོད་སྨད་བར་གསུམ་སྟེ་ཆོལ་ཁ་གསུམ་གྱི་བོད་མི་ཡོངས་ནས་འདི་དང་འདི་ལྟ་བུའི་མེས་པོའི་ཤུལ་བཞག་སྲོལ་རྒྱུན་རིག་གནས་གང་ཞིག་ཡིན་ནའང་རྒྱུན་འཛིན་དར་སྤེལ་བཏང་དང་གཏོང་བཞིན་པར་སྙིང་ཐག་པ་ནས་དམིགས་བསལ་བཀའ་དྲིན་ཆེ་ཞུ་རྒྱུ་ཡིན། སྲོལ་རྒྱུན་ཁམས་གཞས་འདིའི་རིགས་ནི་ཕྲན་གྱི་མི་ཚེའི་ཚེ་རོགས་ལྟ་བུ་ཡིན་པས། ཁོ་བོའི་གཤིས་ཀ་ལ་འཇགས་ཚར་བ་ཞིག་ཡིན་ན་བཙན་གྱིས་འགྱུར་བ་གཏོང་རྒྱུ་ཁག་པོ་འདུག ང་དགེ་སློང་ཡིན་དུས། དགེ་བཤེས་ཡིན་དུས། དགེ་རྒན་ཡིན་དུས། དགེ་བ་སྒྲུབ་པའི་དུས་ཚོད་སོགས། བར་བར་ནས། གཡས་ལྟ་གཡོན་ལྟ་བྱེད་བཞིན། དངངས་སྐྲག་བྱེད་བཞིན། སྒོ་དང་སྒེའུ་ཁུང་བརྒྱབ་ནས་མང་པོ་མང་པོ་ཁྲབ་ཚར། གྲྭ་པ་མིན་པའི་གནས་བབ་འདིའི་འོག་ནས་གཞས་འདི་རིགས་ཁྲབ་དུས། དེ་ཙམ་ཡང་མི་བཟོད་པས་མིག་ལོག་དང་ཐུ་ལུད་རྒྱབ་གིན་འདུག ཁྲིམས་ལྡན་གྱི་རྒྱལ་ཁབ་འདིར་རྡོ་དང་དབྱུག་པས་བདའ་ས་མེད་ནའང་ལས་ཤོག་གིས་རྡོ་བརྡུང་བྱེད་ཀྱིན་འདུག

ཞུས་ཙང་། གསུང་དབྱངས་སྙན་པོ་དེ་རྣ་བའི་བདུད་རྩི་ཞིག་དང་སྒྱུ་རྩལ་རང་བཞིན་གྱི་སྒོར་གཞས་དེ་ལ་བྲོ་བ་དམིགས་བསལ་བ་ཞིག་འདུག སྤྲང་པོ་ཉལ་སའི་ནང་མི་འཆམ་པའི་དབྱེ་འབྱེད་རིང་ལུགས་ཀྱི་བྱ་ངན་དང་། དགྲ་བོར་སྤྲེད་ལད། ནང་ཁུལ་མཛུབ་མོ་བཙུགས་རེས། རྨོངས་དད་ཀྱི་འགྲན་སྡུར། མིང་གི་ཆེད་དུ་ཐམས་ཅད་བློས་གཏོང་བ། ཁ་ནས་སྦར་བ་གང་མ་གཏོགས་མེད་ཟེར། དེའང་ཁ་འཐོར་དགུ་འཐོར་བཏང་། ཆིག་སྒྲིལ་ལ་དགའ་མཁན་ཚོ་ལམ་ཁ་དེར་བཙན་དེད་བྱས། དེ་སྔ་བེད་སྦྱོད་ཡང་ཡང་བཏང་པའི་ཆོས་ལུགས་ཆོས་བརྒྱུད་ཀྱི་ཤོག་འཐེན། ཆོལ་ཁ་ཡོད་ས་ལ་ཆོལ་ཁ་དུམ་བུ། ཆོལ་ཁ་མེད་ས་ལ་ཆོལ་ཁ་གསར་བཟོ། ཚོགས་པ་མེད་ས་ལ་ཚོགས་པ་གསར་བཟོ། དེ་དག་ཐམས་ཅད་དོན་དངོས་ནང་ཁུལ་དུམ་བུའི་ཆེད་དུ་གྱུར་པ་མ་ཟད། ཁ་དང་ཁ་སྤུ་དབྱེ་འབྱེད་ཟེར་བའི་ཚིག་དེ་ཨ་ལ་ལ། “ཆོས་དང་ཟང་ཟིང་” ཟེར་བའི་ཚིག་དུམ་དེའང་བོད་ཀྱི་ལོ་རྒྱུས་ནང་ནང་ཁུལ་དུམ་བུར་གཏོང་བའི་མཚོན་ཆ་གསར་ཤོས་ཤིག་ཏུ་གྱུར་སོང་། ལུང་པ་འདིར་མེ་མདས་མྱི་བདའ་ས་མེད་ནའང་རིགས་ཞེན་ཅན་དང་མང་བཀུར་མི་སྣ་རྣམས་མ་ཉེས་ཁག་གཡོག་དང་ལས་ཤོག་གིས་བདའ་གདའ། གང་ལྟར། གཞིས་ལུས་མི་མང་ལ་རྩིས་སྤྲོད་བྱ་རྒྱུ་ནི་དབྱེ་འབྱེད་རིང་ལུགས་སྤེལ་རྒྱུ། དེ་མ་གཏོགས་ཧ་ལམ་ལྷག་མེད་པ་ལྟ་བུ་ཆགས་རྩིས་ཡོད། དགོངས་དག

འོན་ཀྱང་། ང་ནི་དབྱེ་འབྱེད་ལ་ནམ་ཡང་མི་དགའ་ཞིང་དེར་མོས་མཐུན་བྱ་འདོད་མེད། ཚིག་བརྗོད་གང་ཞིག་གིས་གནོད་ཤུགས་ཀྱིས་འོག་ནས་དབྱེ་འབྱེད་ཀྱི་ཕྱོགས་སུ་དོན་དག་ག་གེ་མོར་ངས་དམ་བཅའ་བྱེད་མྱོང་ཡོད། གནད་དོན་དེ་ཡ་རབས་དང་དོན་དངོས། ཁྱེད་རྣམ་པའི་དགོངས་ཚུལ་དང་ཕྲན་གྱི་གཞི་རྩའི་བསམ་བློ་དང་ཡོངས་སུ་མི་མཐུན་པའི་བྱ་བ་ཞིག་ཡིན་པས། དེ་རིང་ངའི་སྲོག་ཤོར་བ་ལ་ཆ་བཞག་ན། དེ་ནི་ངས་འཇིག་རྟེན་ཕྱི་མ་ལ་མི་འདོད་བཞིན་དུ་ཁྱེར་དགོས་པའི་སེམས་འགྱོད་ཆེ་ཤོས་དེ་ལོས་ཡིན། དཀོན་མཆོག་གིས་ང་ལ་དུས་ཚོད་ཅིག་གནང་ན། གནད་དོན་དེ་ངས་གཙང་མ་གཙང་རྐྱང་བཟོ་རྩིས་ཡོད།

བླ་མའི་མཚན་གྲགས་སྒེར་ནད་སངས་པའི་ཆེད་དུ་བེད་སྤྱོད་གཏོང་བ་ནི། བོད་པའི་ལོ་རྒྱུས་གསར་པ་ཞིག་མིན་ནའང་སྤྱི་ཚོགས་འདིར་དེང་སང་རྒྱུག་ཆེན་པོ་འདུག གང་ལྟར། ཕྲན་རང་ཉིད་ལ་ཆ་བཞག་ན། ནམ་ཡང་གཞིས་ལུས་སྤུན་ཟླ་ཁྱེད་རྣམ་པའི་མངོན་འདོད་སྒྲུབ་བཞིན་ཡོད། ཤུགས་རྐྱེན་ཆེ་བས་དབང་གིས་གུས་པ་བོད་ནང་དུ་ལོག་མི་ཐུབ་པ་དང་ཕ་མ་གཉིས་ཀྱིས་གཙོས་ནང་མི་ཉེ་འབྲེལ་ཡོངས་ལ་ཐུག་རེ་བྲལ་ཡང་འགྱོད་པ་རྩ་བ་ནས་མེད། རླབས་ཆེན་མེས་པོ་གོང་མའི་བློས་གཏོང་ལ་ཡི་རངས་བྱས་ནས་བློ་ཐག་རྦད་བཅད་ཀྱིས་རང་འཁྲིའི་ཁུར་བབ་ལས་དོན་ཁག་འཐུས་ཤོར་མེད་པར་སྒྲུབ་བཞིན་ཡོད། བཀྲ་ཤིས་བདེ་ལེགས། ཞེས་

གསར་འགོད་པ་ཉག་ཆུ་སྔོན་མོས། ཞོགས་ཟས་ཀྱི་ཞོར་ནས་ཨ་རིའི་གྲོང་ཁྱེར་ནིའུ་ཡོག་ནས་ཕུལ།། །། ༢༠༢༠/༡༢/༡༩

སེམས་ཚོར་ཟིན་བྲིས་ཤིག   གསར་འགོད་པ་ཉག་ཆུ་སྔོན་མོ།