དཔལ་ལྡན་ཤེས་རིག་བཀའ་བློན་མཆོག་ཉམས་ཞིབ་ཚོགས་འདུར་ཕེབས་པ།

ཐེངས་ 6214 བཀླགས་འདུག

༄༅། །བོད་མིའི་སྒྲིག་འཛུགས་ཀྱི་བོད་ཀྱི་སྲིད་བྱུས་ཉམས་ཞིབ་ཁང་གི་གོ་སྒྲིག་འོག་ཕྱི་ལོ་ ༢༠༡༩ ཟླ་ ༡ ཚེས་ ༢༢ ནས་ ༢༤ བར་ཉིན་གྲངས་གསུམ་རིང་བཞུགས་སྒར་རྡ་སའི་ཉེ་འགྲམ་དུ་ཡོད་པའི་སཱ་ར་བོད་ཀྱི་མཐོ་རིམ་སློབ་གཉེར་ཁང་དུ་རྒྱ་གར་ན་གཞོན་བོད་དོན་ཉམས་ཞིབ་པའི་ཚོགས་འདུ་ཐེངས་དང་པོ་དབུ་འཛུགས་གནང་ཡོད།

དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༡༡ ཐོག་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་ཤེས་རིག་བཀའ་བློན་འབུམ་རམས་པ་པདྨ་དབྱངས་ཅན་མཆོག་དང་། དམིགས་བསལ་སྐུ་མགྲོན་ཧི་མཱ་ཅལ་དབུས་གཙུག་ལག་སློབ་གྲྭའི་ཉེ་བའི་རིགས་བདག་སློབ་དཔོན་ཀུལ་དྷིབ་ཅནྟ་ཨཀ་ནི་ཧོ་ཏྲི་ Prof. Dr. Kuldip Chand Agnihotri མཆོག རྡ་ས་རིགས་ལམ་སློབ་གཉེར་ཁང་གི་སྤྱི་ཁྱབ་འགན་འཛིན་དགེ་བཤེས་བློ་བཟང་བསམ་གཏན་ལགས། བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཚེ་རིང་དབྱངས་སྐྱིད་ལགས་དང་འགན་འཛིན་གཞོན་པ་བསྟན་འཛིན་ལེགས་བཤད་ལགས། རྒྱ་གར་ནང་གི་མཐོ་སློབ་དང་ཉམས་ཞིབ་བསྟི་གནས་ཁང་ཁག་ ༡༣ ནས་སློབ་དཔོན་དང་། འབུམ་རམས་པའི་སློབ་གཉེར་གནང་བཞིན་པའི་སློབ་ཕྲུག་གྲངས་དང་ཉེ་བའི་འབུམ་རམས་པ་བཅས་ཁྱོན་རྒྱ་གར་ན་གཞོན་ཉམས་ཞིབ་པ་ ༢༢ དང་། ཟུར་ཉན་པ་མི་གྲངས་ ༡༧ ། གསར་འགོད་པ་བཅས་ཁྱོན་མི་གྲངས་ ༥༠ ལྷག་ཙམ་ལྷན་འཛོམས་ཀྱིས་ཐོག་མར་སྐུ་མགྲོན་གཙོ་བོ་ཤེས་རིག་བཀའ་བློན་འབུམ་རམས་པ་པདྨ་དབྱངས་ཅན་མཆོག་དང་དམིགས་བསལ་སྐུ་མགྲོན་སློབ་དཔོན་ཀུལ་དྷིབ་ཅནྟ་ཨཀ་ནི་ཧོ་ཏྲི་མཆོག་གིས་སྣང་གསལ་ཞལ་ཕྱེ་གནང་གྲུབ་མཚམས་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཚེ་རིང་དབྱངས་སྐྱིད་ལགས་ཀྱིས་འཚམས་འདྲི་དང་སྦྲགས་གསུང་བཤད་གནང་དོན། ལོ་རྒྱུས་ཐོག་ནས་འཕགས་བོད་གཉིས་དབར་འབྲེལ་ལམ་གཏིང་ཟབ་ཡོད་པ་དང་། ཕྱོགས་མཚུངས་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས། ངོས་རང་རྒྱ་གར་གྱི་བུ་ཡིན་ཞེས་བཀའ་སློབ་ཕེབས་ཀྱི་ཡོད།

སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་རླབས་ཆེན་གྱི་མཛད་ཁུར་ཁྲོད་རྒྱ་གར་གནའ་རབས་སྲོལ་རྒྱུན་རིག་གཞུང་དེ་དག་སླར་གསོ་མཛད་རྒྱུ་དེ་གཅིག་རེད། བོད་མི་རྣམས་གཉེན་འཕྲང་ཅན་གྱི་དུས་སྐབས་འདིར་རྒྱ་གར་གཞུང་དང་མང་ཚོགས་ནས་རྒྱབ་སྐྱོར་ཤུགས་ཆེ་གནང་བར་བརྟེན་ད་ཆ་ང་ཚོ་འཕགས་པའི་ཡུལ་དུ་ཞི་བདེ་དང་རང་དབང་ཆ་ཚང་ལྡན་པའི་སྒོ་ནས་གནས་བཞིན་ཡོད། འཕགས་བོད་གཉིས་ཀྱི་བདེ་འཇགས་ཀྱི་ཐོག་ལ་མཉམ་རུབ་ཀྱི་ལས་དོན་བྱེད་དགོས་རྒྱུ་ཧ་ཅང་གལ་ཆེན་པོ་ཞིག་ཡིན་པའི་ཐོག་ནས་ད་ཐེངས་ཚོགས་ཆེན་འདིའི་བརྒྱུད་ནས་ཕ་བརྒྱུད་ཀྱི་འབྲེལ་ལམ་དེ་བཞིན་གསར་འཛུགས་བྱ་རྒྱུ་ཡིན། ཞེས་སོགས་ཀྱི་གསུང་བཤད་གནང་།

དེ་རྗེས་དམིགས་བསལ་སྐུ་མགྲོན་མཆོག་གི་གསུང་དོན། ཐོག་མར་དེ་རིང་འདིར་ཚོགས་ཆེན་དུ་རྒྱ་གར་ས་ཁུལ་འདྲ་མིན་ནས་རྒྱ་གར་ན་གཞོན་ཉམས་ཞིབ་པ་བསྐོང་ཚོགས་གནང་བར་ཐུགས་རྗེ་ཞུ་རྒྱུ་ཡིན། སྟོན་པ་སངས་རྒྱས་བཅོམ་ལྡན་འདས་བྱོན་པའི་སྐབས་ནས་བཟུང་འཕགས་བོད་གཉིས་ཀྱི་དབར་འབྲེལ་བ་གཏིང་ཟབ་ཡོད། ང་ཚོ་ཚང་མས་འཕྱར་གྲུ་མཉམ་འདེགས་ཐོག་ནས་ད་ལྟའི་བོད་ནང་གི་ཛ་དྲག་གནས་སྟངས་སེལ་ཐབས་སླད་འབད་བརྩོན་གནང་དགོས་རྒྱུ་ཧ་ཅང་གལ་ཆེན་པོ་རེད། ད་ཆ་རྒྱ་ནག་ནི་འཛམ་གླིང་ནང་གང་ཅིའི་ཐད་སྟོབས་ཤུགས་ལྡན་པའི་རྒྱལ་ཁབ་ཅིག་ཡིན། བོད་མི་རྣམས་ཀྱི་བསམ་བློའི་བག་ཆགས་ནང་རྒྱལ་ཞེན་གྱི་བསམ་བློ་ཟེར་ནའང་གཙོ་བོར་བོད་མི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཡིན། དེ་ནི་ཧ་ཅང་ཡག་པོ་རེད།

གཞན་ཡང་རྒྱ་ནག་གཞུང་གིས་བོད་ཐོག་འཛིན་པའི་དྲག་གནོན་ཅན་གྱི་སྲིད་བྱུས་དེར་བོད་མི་རྣམས་བཟོད་ཐབས་བྲལ་ཏེ་རྒྱ་ནག་གཞུང་ལ་ཞི་རྒོལ་སླད་རང་ལུས་མེར་སྲེག་བཏང་ཡོད་སྐོར་དང་། བོད་མི་ན་གཞོན་རྣམས་ད་ཆ་ཕྱི་རྒྱལ་ཡུལ་གྲུ་ཁག་ཏུ་ཇེ་མང་འགྲོ་བཞིན་ཡོད་པའི་སྐབས་འདིར་བོད་མི་རིགས་ཀྱི་ཐུན་མིན་སྐད་ཡིག་ལ་སོགས་ཉམས་རྒུད་དུ་འགྲོ་རྒྱུའི་ཉེན་ཁ་ཆེན་པོ་ཡོད། དེར་བརྟེན་བོད་ཀྱི་ཐུན་མིན་ཆོས་དང་རིག་གཞུང་། སྐད་ཡིག་བཅས་སྲུང་སྐྱོབ་སླད་ལས་འགུལ་གང་མང་སྤེལ་དགོས་རྒྱུ་ཧ་ཅང་གལ་ཆེན་པོ་རེད། འཕགས་བོད་གཉིས་དབར་གནའ་དེང་གི་རིག་གཞུང་འབྲེལ་ལམ་གཏིང་ཟབ་ཡོད་པ་མུ་མཐུད་རྒྱུན་སྐྱོང་བྱེད་དགོས། ཞེས་སོགས་ཀྱི་གསུང་བཤད་གནང་།

དེ་ནས་ཤེས་རིག་བཀའ་བློན་མཆོག་གིས་གསུང་བཤད་གནང་དོན། སློབ་སྦྱོང་ནི་ཧ་ཅང་གལ་ཆེན་པོ་རེད། རྣམ་པ་ཚོར་སློབ་སྦྱོང་བྱེད་རྒྱུའི་གོ་སྐབས་བཟང་པོ་ཐོབ་པར་བརྟེན་སོ་སོ་རང་ཉིད་བསོད་ནམས་ཆེན་པོ་ཡིན་པ་ཚོར་དགོས་པ་མ་ཟད། ཚོགས་པ་ཁག་ཏུ་ཞབས་འདེགས་ཞུ་དགོས་པའི་འགན་ཞིག་ཀྱང་ཡོད་བསམ་པ་དྲན་དགོས། མ་འོངས་པར་འདི་ལྟ་བུའི་ཚོགས་ཆེན་མུ་མཐུད་བསྐོང་ཚོགས་གནང་དགོས་རྒྱུ་ཧ་ཅང་གལ་ཆེན་པོ་རེད། ཅེས་དང་། གཞན་ཡང་བཀའ་བློན་མཆོག་གིས་རང་ཉིད་འབུམ་རམས་པའི་སློབ་སྦྱོང་གནང་བའི་སྐབས་ཀྱི་མྱོང་ཚོར་དང་སྦྲགས་ཏེ་གསུང་བཤད་གནང་གྲུབ་རྗེས་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་གཞོན་པ་བསྟན་འཛིན་ལེགས་བཤད་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་སྟེ་དབུ་འབྱེད་མཛད་སྒོ་མཇུག་སྒྲིལ་ཡོད་པ་བཅས། གནས་ཚུལ་ཡོང་ཁུངས་ www.bod.asia ཞེས་པའི་དྲ་ཚིགས།