ཉིས་སྟོང་བཅུ་བཞི་ལོའི་བཙན་བྱོལ་ནང་གི་གསར་འགྱུར་ཆེ་ཁག་ཕྱོཌ་སྡོམ།
ཐེངས་ 7118 བཀླགས་འདུག
༢༠༡༤ ལོའི་བཙན་བྱོལ་ནང་གི་གནས་ཚུལ་ཆེ་ཁག་ཕྱོགས་བསྒྲིགས།
ཕྱི་ལོ་༢༠༡༤ ལོར་བཙན་བྱོལ་བོད་མིའི་སྤྱི་ཚོགས་དང་འབྲེལ་བའི་གསར་འགྱུར་ཆེ་བ་ཁག་ཅིག་ལ། བསྐྱར་ཞིབ་དང་འབྲེལ་ཕྱོགས་བསྒྲིགས་བྱས་ཡོད།
གཅིག ཕྱི་ཟླ་༡༢ ཚེས་༡༢ ནས་༡༤ ཉིན་བར་༧གོང་ས་མཆོག་ཨི་ཊ་ལིའི་རྒྱལ་ས་རོམ་དུ། འཛམ་གླིང་གི་ཞི་བདེའི་གཟེངས་རྟགས་བཞེས་མྱོང་མཁན་གྱི་ལྷན་ཚོགས་ཐེངས་༡༤ པའི་ཐོག་མཉམ་ཞུགས་གནང་སྟེ། ཁོང་གིས་འཛམ་གླིང་ཞི་བདེ་དང་། ཁོར་ཡུག་སྲུང་སྐྱོབ་སོགས་བརྗོད་གཞི་ཁག་ཅིག་གི་ཐོག་གསུང་བཤད་གནང་ཡོད་པ་རེད།
གཉིས། ཕྱི་ཟླ་༡༢ པའི་ཚེས་༡༠ ཉིན་རྒྱལ་སྤྱིའི་འགྲོ་བ་མིའི་ཐོབ་ཐང་ཉིན་མོ་དང་བསྟུན་ཏེ། བོད་མིའི་སྒྲིག་འཛུགས་ཀྱི་གོ་སྒྲིག་འོག སྐུ་མགྲོན་གཙོ་བོ་ཧི་མཱ་ཅལ་མངའ་སྡེའི་བློན་ཆེན་སྐུ་ཞབས་Virbhadra Singh གདན་ཞུས་ཀྱིས། ཐེག་ཆེན་ཆོས་གླིང་གཙུག་ལག་ཁང་དུ་༧གོང་ས་མཆོག་ལ་ནོ་བེལ་ཞི་བདེའི་གཟེངས་རྟགས་ཕུལ་ནས་ལོ་༢༥ འཁོར་བའི་དུས་དྲན་སྲུང་བརྩི་ཞུས་ཡོད་པ་རེད།
གསུམ། ཕྱི་ཟླ་༡༡ ཚེས་༦ ཉིན་ཤེས་རབ་དགའ་ཚལ་སློབ་གླིང་གི་གོ་སྒྲིག་འོག སྐབས་གཉིས་པའི་བོད་ཀྱི་ཐ་སྙད་གསར་པ་འགྲན་བསྡུར་དེ་སློབ་གླིང་དེའི་ཚོགས་ཁང་ནང་བྱས་ཡོད་ཅིང་། འགྲན་བསྡུར་དེའི་སྟེང་བཙན་བྱོལ་ནང་གི་མཐོ་སློབ་དང་། སློབ་གྲྭ གྲྭ་ཚང་། བཙུན་དགོན་སོགས་ཤེས་ཡོན་གྱི་ཚོགས་སྡེ་ཁག་༡༦ ནས་འགྲན་ཞུགས་པ་༨༠ འགྲན་བསྡུར་བྱས་མཐར། དཔེ་སྟོན་སློབ་གྲྭར་ཐེངས་འདིའི་རྒྱལ་ཁ་ཐོབ་སྟེ་ཧིན་སྒོར་༣༠༠༠༠ གྱི་བྱ་དགའ་གནང་ཡོད་པ་རེད།
བཞི། ཕྱི་ཟླ་༡༠ ཚེས་༡༢ ནས་༡༥ བར་ཅེཀ་སྤྱི་མཐུན་རྒྱལ་ཁབ་ཏུ། ༢༠༠༠ གླེང་སྟེགས་ཞེས་པའི་རྒྱལ་སྤྱིའི་དབུ་ཁྲིད་ཀྱི་ལྷན་ཚོགས་ཐེངས་༡༨ པའི་སྟེང་། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཉམ་ཞུགས་ཀྱིས་བརྗོད་གཞི་ཁག་ཅིག་གི་ཐོག་གསུང་བཤད་གནང་ཡོད་པ་དང་། དེ་བཞིན་ལྷན་ཚོགས་དེའི་ཐོག་རྒྱལ་ཁབ་འདྲ་མིན་ནས་ཆབ་སྲིད་དང་། ཤེས་ཡོན། གསར་འགྱུར་བརྒྱུད་ལམ། ཚོང་ལས། ཆོས་ཕྱོགས་བཅས་ལས་རིགས་འདྲ་མིན་གྱི་དབུ་ཁྲིད་གྲངས་༢༠༠ ཙམ་མཉམ་ཞུགས་གནང་ཡོད་པ་རེད།
ལྔ། སྐབས་བཅུ་བཞི་པའི་བཀའ་ཤག་གིས་ཕྱི་ལོ་༢༠༡༤ ལོ་དེ། ༧གོང་ས་མཆོག་ལ་བཀའ་དྲིན་རྗེས་དྲན་གྱི་ལོར་སྲུང་བརྩི་བྱེད་ཀྱི་ཡོད་པ་ལྟར། ཕྱི་ཟླ་༡༠ ཚེས་༢ ཉིན་གྷན་དྷིའི་འཁྲུངས་སྐར་དང་བསྟུན་ཏེ། སྐུ་མགྲོན་གཙོ་བོ་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་ལྕམ་སྐུ་ཇོ་ཌི་ཝིལེ་ཡེམ་སི་Jody Williams དང་། ལྕམ་སྐུ་ཤི་རིན་ཨི་བྷ་ཌི་Shirin Ebadi གཉིས་གདན་ཞུས་ཀྱིས། ༧གོང་ས་མཆོག་ལ་ནོ་བེལ་ཞི་བདེའི་གཟེངས་རྟགས་ཕུལ་ནས་ལོ་༢༥ འཁོར་བའི་དུས་དྲན་སྲུང་བརྩི་ཞུས་ཡོད་པ་རེད།
དྲུག ། ཕྱི་ཟླ་༩ ཚེས་༢༠ ཉིན་སྐབས་བཅོ་ལྔ་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་ དུས་༨ པའི་སྟེང་། ཤེས་རིག་བཀའ་བློན་དངོས་གྲུབ་ཚེ་རིང་གིས། ལོ་འཁོར་ལས་བསྡོམས་སྙིང་བསྡུས་སྒྲོགས་སྦྱང་གནང་བའི་ནང་འཁོད་པ་ལྟར་ན། ལོ་འདིར་རྒྱ་གར་རྒྱལ་ཡོངས་འཛིན་རིམ་༡༢ སློབ་གྲྭ་ཁག་༡༦ གི་སློབ་ཕྲུག་༡༥༣༥ ཡིག་རྒྱུགས་ནང་ཞུགས་ཏེ། རྒྱུགས་འཕྲོད་པ་སློབ་ཕྲུག་༡༣༣༡ བྱུང་བའི་སྤྱི་ཡོངས་ཡིག་རྒྱུགས་ཀྱི་བརྒྱ་ཆ་༨༦.༧༡ དང་། དེ་བཞིན་འཛིན་རིམ་༡༠ ཅན་གྱི་སློབ་གྲྭ་ཁག་༡༦ གི་སློབ་མ་༡༦༠༦ ཡིག་རྒྱུགས་ནང་ཞུགས་ཏེ། རྒྱུགས་འཕྲོད་པ་སློབ་མ་གྲངས་༡༥༩༦ བྱུང་བའི་སྤྱི་ཡོངས་ཡིག་རྒྱུགས་ཀྱི་བརྒྱ་ཆ་༩༩.༣༨ ཆགས་ཡོད་པ་རེད།
བདུན། ཕྱི་ཟླ་༡༠ ཚེས་༢༠ ཉིན་རྒྱ་གར་དབུས་ནང་སྲིད་ལྷན་ཁང་གིས། ༢༠༡༤ ལོའི་བཙན་བྱོལ་བོད་མིར་མཐུན་རྐྱེན་སྤྲོད་ཕྱོགས་ཀྱི་སྲིད་ཇུས་ཞེས་པའི་གཏན་འབེབས་ཡིག་ཆ་ཞིག་བོད་མིའི་སྒྲིག་འཛུགས་ཀྱི་ནང་སྲིད་བཀའ་བློན་ལ་གནང་ཡོད་པའི་ནང་། རྒྱ་གར་གཞུང་གིས་མང་ཚོགས་བདེ་དོན་དང་འབྲེལ་བའི་ལས་འཆར་གང་ཞིག་སྤེལ་ཡང་། བོད་མི་སྐྱབས་བཅོལ་ལག་དེབ་RC ཡོད་མཁན་ཡོངས་ཀྱིས་རྒྱ་གར་ཡུལ་མི་དང་ཐོབ་ཐང་གཅིག་མཚུངས་ལེན་ཆོག་སྐོར་འཁོད་ཡོད་པ་རེད།
བརྒྱད། ཕྱི་ཟླ་༩ ཚེས་༢ ཉིན་བོད་མིའི་སྒྲིག་འཛུགས་ཀྱི་གོ་སྒྲིག་འོག ཐེག་ཆེན་ཆོས་གླིང་གཙུག་ལག་ཁང་གི་གསུང་ཆོས་རྭ་བའི་ནང་། སྐུ་མགྲོན་གཙོ་བོ་རྒྱ་གར་ཧི་མཱ་ཅལ་མངའ་སྡེའི་གྲོས་ཚོགས་འཐུས་མི་སྐུ་ཞབས་(Shri Ravi Thakur) གདན་ཞུས་ཀྱིས། ༧གོང་ས་མཆོག་གིས་བོད་མི་ཡོངས་ལ་མང་གཙོའི་གསོལ་རས་གནང་ཏེ། ལོ་ངོ་༥༤ འཁོར་བའི་དུས་དྲན་སྲུང་བརྩི་ཞུས་ཡོད་པ་རེད།
དགུ ། ཕྱི་ཟླ་༧ ཚེས་༣ ནས་༡༤ ཉིན་བར་༧གོང་ས་མཆོག་གིས་ལ་དྭགས་ཞི་བའི་ཚལ་ཕོ་བྲང་དུ། དཔལ་དུས་ཀྱི་འཁོར་ལོའི་བཀའ་དབང་ཐེངས་༣༣ པ་དེ་གནང་ཡོད་པ་དང་། དེར་བོད་ནང་དང་རྒྱ་ནག་སྐམ་ས་ཆེན་མོ། དེ་བཞིན་འཛམ་གླིང་རྒྱལ་ཁབ་འདྲ་མིན་ནས་ཆོས་ཞུ་བ་༡༢༠༠༠༠ ལྷག་འདུ་འཛོམས་བྱུང་ཡོད་པ་རེད།
བཅུ། ཕྱི་ཟླ་༤ པའི་ཚེས་༧ ཉིན་ནས་བཟུང་རྒྱ་གར་གྱི་གྲོས་ཚོགས་འོག་མའི་འོས་བསྡུ་ཐེངས་༡༦ པ་དེ་འགོ་འཛུགས་ཀྱིས། རྒྱ་གར་གྱི་གྲོས་ཚོགས་འོག་མའི་འོས་བསྡུ་ཆེན་མོ་དེ་རྒྱལ་ཡོངས་སུ་སྡེ་ཚན་ཁག་༩ ལ་བགོས་ཏེ་བདུན་ཕྲག་༥ རིང་འོས་འདེམས་བྱས་ཡོད་པའི་ཁྲོད། བོད་མི་ཡང་མི་ཉུང་བ་ཞིག་གིས་ཐེངས་འདིའི་རྒྱ་གར་གྱི་གྲོས་ཚོགས་འཐུས་མི་འོས་འདེམས་ཀྱི་ཆ་ཤས་བླངས་ཡོད་པ་རེད།
བཅུ་གཅིག ། ཕྱི་ཟླ་༨ ཚེས་༡༡ ཉིན་ནས་ཉིན་དྲུག་རིང་བོད་ཀྱི་གཞོན་ནུ་ལྷན་ཚོགས་ཀྱི་འགན་འཛིན་ལྷན་ཚོགས་ཐེངས་༤༥ པ་དེ། འབྲས་ལྗོངས་སྒང་ཏོག་ཏུ་ཡོད་པའི་ཆོལ་གསུམ་ཚོགས་ཁང་ནང་འཚོགས་སྐབས། ས་གནས་ཁག་བརྒྱད་གཞོན་ལྷན་གྱི་སྒྲིག་ཁོངས་ནས་མ་བསྡད་པར། ཟུར་དུ་ཐོན་པ་དེའི་ཐོག་གྲོས་ཆོད་ཁག་ཅིག་བཞག་ཡོད་པ་དེར། ཟླ་༩ ཚེས་༡༧ ཉིན་ས་གནས་ཁག་བརྒྱད་ཀྱིས་ལྷན་ཚོགས་ཀྱི་གྲོས་ཆོད་དེ་ངོས་ལེན་མེད་པའི་གསལ་བསྒྲགས་བྱས་ཡོད་པ་རེད།
བཅུ་གཉིས། ཕྱི་ལོ་ཟླ་༦ ཚེས་༢༤ ཉིན་བརྒྱུད་ལམ་ཁག་ཅིག་ཏུ་གནས་ཚུལ་སྤེལ་གསལ་ལྟར་ན། བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་ཁོངས་གཏོགས། བལ་ཡུལ་གྱི་མཆོད་རྟེན་བྱ་རུང་ཁ་ཤོར་ཆེན་མོའི་ཁུལ་དུ་ཡོད་པའི་སྲོང་བཙན་སློབ་གྲྭའི་དགེ་ཆེ་མ་ཧེ་ཞིས་ཐཱ་པ་Mahesh Thapa ཟེར་བས། སློབ་གྲྭའི་བུ་མོ་ཁག་ཅིག་ལ་ཚུལ་མིན་བྱ་སྤྱོད་སྤེལ་བ་དང་། བཙན་གཡེམ་བྱས་པའི་གནས་ཚུལ་བྱུང་རྗེས། སློབ་གྲའི་འགན་འཛིན་ལྷན་ཚོགས་ཚོགས་ཀྱིས་ཁོང་སློབ་གྲྭ་ནས་གནས་དབྱུང་བཏང་ཡོད་པ་རེད།
བཅུ་གསུམ།
ཕྱི་༢༠༡༤ ལོར་བོད་ཀྱི་ཆབ་སྲིད་བཙོན་པ་དང་། འབྲེལ་ཡོད། འབྲེལ་ཆགས་བཅས་ཀྱི་ནང་ནས་མི་ཉིས་བརྒྱ་ལྷག་ཨོ་སི་ཁྲུ་ལི་ཡར་སྐྱབས་བཅོལ་དུ་ལེན་རྒྱུའི་རྒྱན་ཤོག་འཕངས་པའི་ཁྲོད། དགུ་བཅུ་གསུམ་གྱི་རྒྱུན་ལས་མི་༡༥ ནང་ནས་མི་༡༡ ལ་རྒྱན་ཤོག་ཐོབ་སྟེ་རྒྱུན་ལས་ནས་དགོངས་པ་ཞུས་ཡོད་པར་བརྟེན། ཕྱི་ཟླ་༥ ཚེས་༢༤ ནས་ཉིན་གཉིས་རིང་དྷ་སར་དགུ་བཅུ་གསུམ་ལས་འགུལ་ཚོགས་པའི་ཚོགས་ཁང་དུ་ཛ་དྲག་ཚོགས་ཆེན་ཞིག་འཚོགས་ཏེ། རྒྱུན་ལས་གསར་པ་༡༡ འོས་འདེམས་བྱས་ཡོད་པ་རེད།
བཅུ་བཞི། ཕྱི་ཟླ་༥ ཚེས་༧ ཉིན་དྷ་སའི་ཉེ་འགྲམ་དུ་ཡོད་པའི་གྷོ་པལ་པུར་སློབ་གྲྭའི་མ་བྱན་པདྨ་རྣམ་རྒྱལ་ཟེར་བ་ཞིག་གིས། སློབ་གྲྭ་དེའི་ཁྱིམ་ཚང་༡༣ ནང་གི་བུ་མོ་ལོ་༡༣ ཅན་ཞིག་ལ་བཙན་གཡེམ་བྱས་ཡོད་པའི་གནས་ཚུལ་ཐོན་ཡོད་པ་དང་། ཕྱི་ཚེས་༡༢ ཉིན་འདི་གའི་གསར་འགོད་པས་སློབ་གྲྭ་དེའི་འགན་འཛིན་ཚུལ་ཁྲིམས་རྡོ་རྗེར་ཁ་པར་བརྒྱུད་གནས་འདྲི་བྱེད་སྐབས། ཁོང་གིས་གནས་ཚུལ་འདི་རྒྱ་གར་གྱི་ཁྲིམས་ཐོག་འགྲོ་བཞིན་ཡོད་པར་བརྟེན་གནད་དོན་དེའི་ཐད་སྐད་ཆ་བཤད་ཐུབ་ཀྱི་མེད་སྐོར་འགྲེལ་བརྗོད་གནང་སོང་། གནས་ཚུལ་ཡོང་ཁུངས་བོད་ཀྱི་བང་ཆེན།
