༸དཔལ་རྒྱལ་བ་ཀརྨ་པ་མཆོག་དང་འབྲེལ་བའི་རྩོམ་ཡིག་གཅིག་འདུག

ཐེངས་ 11115 བཀླགས་འདུག

༸དཔལ་རྒྱལ་དབང་༸ཀརྨ་པ་མཆོག་ལ་མཚན་ཤས་བཟོ་ཐབས་དང་འབྲེལ་བའི་ལྟ་ཚུལ།

ཉིན་ཤས་སྔོན་ 中国报 ཟེར་བའི་དྲ་བའི་ནང་༸དཔལ་རྒྱལ་དབང་༸ཀརྨ་མཆོག་སྡོམ་གཙང་མིན་ཚུལ་སྐོར་བརྙན་ཐུང་དང་རྩོམ་ཐུང་ཞིག་བཅས་སྤེལ་འདུག་ཅིང་། ཕྲན་གྱིས་རྩོམ་དེར་དོ་སྣང་བྱུང་དུས་སྤེལ་ནས་ཆུ་ཚོད་གསུམ་མ་གཏོགས་ཕྱིན་མི་འདུག རྩོམ་དེར་༸རྒྱལ་དབང་ཀརྨ་མཆོག་གི་གསུང་སྐད་སྒྲ་འཇུག་བྱས་པ་ཡིན་རབས་དང་། སྐད་ཆེད་ལས་ཞིབ་འཇུག་པས་ཞིབ་འཇུག་གི་གྲུབ་དོན་ལྟར་ན་བརྒྱ་༩༩་༩ འདྲ་རབས་སོགས་སྒྲུང་རིང་པོ་ཞིག་སྒྲིག་སྦྱོར་བྱས་འདུག །གནས་ཚུལ་སྤེལ་ས་ཚད་ལྡན་གྱི་གསར་ཁང་གང་ཡང་མིན་སྟབས་གནད་དོན་དེར་ཡིད་ཆེས་བྱ་རན་ཡོད་པ་ཞིག་མིན་པ་ཤེས་མོད། གནད་དོན་དེའི་རྒྱབ་མདུན་ན་ཅི་ཞིག་བསླངས་འདུག་མིན་ཤེས་སླད་ཆེད་དུ་གཉེར་ནས་ཞིབ་བལྟ་དང་ཞིབ་ཀློག་བྱས་པས་གཤམ་གསལ་གྱི་གནད་དོན་དག་ར་འཕྲོད་བྱུང་།

༡༽ སྐད་དེ་ཧོབ་ཏེ་ཉན་ན་༸རྒྱལ་དབང་ཀརྨ་མཆོག་གི་གསུང་གདངས་ཅུང་འདྲ་པོ་འདུག་མོད། ཀརྨ་པ་མཆོག་གིས་གསུངས་པའི་རྒྱ་སྐད་གདངས་དང་བསྡུར་ཚེ་ཧེ་བག་ཆེན་པོ་འདུག
༢༽ སྒྲ་འཇུག་སྐར་ཆ་༡༨ཅན་དེའི་ནང་ཆེད་དུ་གཉེར་ནས་”ཨེ་ཡེ་་་ཨེ་ཡེ” ཞེས་པ་དེ་ཚར་འགའ་ཡང་སྐོར་བསྐྱར་སྐོར་གྱི་སྒྲིག་སྦྱོར་བྱས་འདུག་མོད། ནམ་རྒྱུན་༧རྒྱལ་དབང་ཀརྨ་པའི་རྒྱ་སྐད་གསུང་ཆོས་སོགས་ནང་དེ(ཨ་ཡེ་་ཨ་ཡེ) ཞེས་པ་དེ་དེ་འདྲ་མང་པོ་བསྲེས་སྲོལ་མི་འདུག་པས་དེ་དོན་དེ་ཆེད་དུ་གཉེར་ནས་ཀརྨ་པ་མཆོག་གི་གསུང་ཡིན་པར་སྒྲུབ་ཆེད་དུ་སྐར་ཆ་བཅོ་བརྒྱད་ཅན་དེར་སྐད་དེ་ཐེངས་མང་ཡང་བསྐྱར་བཅུག་འདུག

༣༽ མི་གཅིག་གི་སྐད་གདངས་སྒྲའི་རླབས་ཞིབ་འཇུག་ནང་བརྒྱ་ཆ་ %100 གཅིག་པ་ཡིན་དགོས་པ་ལས་ ༠-༩༠ མི་འདྲ་དོན་ཅི་རེད། དེ་ནི་སྒྲའི་ཆེད་ལས་ཞིབ་འཇུག་པ་ཡིན་ཟེར་བའི་མི་དེ་ཁྲིམས་གཏུགས་བྱེད་ཚེ་ཕྱི་བཤོལ་རྒྱག་ས་འཇོག་པ་མིན་པའི་གཞན་གནད་དོན་ཅི་ཡང་མེད། གཞན་ཡང་སྐད་ཞིབ་འཇུག་པ་ཡིན་ཟེར་བའི་མི་དེ་དང་དེའི་འཕྲུལ་ཆ་བཅས་ཚད་ལྡན་ཡིན་པ་ཐག་ཅི་ལྟར་གཅོད་ནུས།
༤༽ སྤྱི་བཏང་དེང་སྐབས་འཕྲུལ་ཆས་དང་མཉེན་ཆས་འདྲ་མིན་ནས་གང་ཟག་ག་གེ་མོའི་སྐད་གདངས་དང་མཐུན་པར་སྒྲིག་བཟོ་བྱ་རྒྱུ་ཡོད་ཅིང་། ལྷག་པར་དུ་སྐད་གདངས་ཅུང་འདྲ་མོ་ཡོད་པ་ཙམ་གྱིས་མི་དེའི་སྐད་ཡིན་པ་ར་སྤྲོད་ཇི་ལྟར་ཐུབ་ཏེ། དཔལ་ཡུལ་བཀྲ་ཤིས་ཀྱི་གླུ་སྐད་གདངས་གླུ་བ་ཀུན་དགའི་སྒྲ་གདངས་དང་འདྲ་བ་ནས་ཨ་རི་ལ་ཡོད་པའི་བོད་ཀྱི་ཕོ་སར་ཞིག་གི་སྐད་གདངས་ཟམ་གདོང་རིན་པོའི་གསུང་གདངས་དང་འདྲ་བ་སོགས་ང་ཚོས་མིག་གིས་བལྟ་རྒྱུ་ཡོད་ལ་རྣ་བས་ཉན་རྒྱུ་ཡོད་བཞིན་པ་ལྟར་རེེད།
༥༽ གོ་ཐོས་ལྟར་ན་རྒྱ་མོ་ H ཟེར་བ་དེ་ཀླད་པ་སྐྱོན་ཅན་ཡིན་རབས་འདུག་པས་ཀླད་པ་སྐྱོན་ཅན་ཁྲིམས་ལུགས་ནང་དམིགས་བསལ་ཡིན་པའི་གོ་སྐབས་བཟུང་ཏེ་ཆེད་དུ་གཉེར་ནས་མ་བདེན་རྫུན་སྒྲིག་དེ་བྱས་ཡོད་པ་གདོན་མི་ཟ།
༦༽ ༸རྒྱལ་དབང་ཀརྨ་པ་ཁོང་ནི་ནམ་རྒྱུན་ནས་ཁ་རུ་ཁ་ཐུག་དང་གུ་ཡངས་ཐོག་ནས་ཕྱག་ལས་ཚང་མ་ཕྱི་གསལ་ནང་གསལ་གནང་མཁན་ཞིག་ཡིན་པ་ནི་རྒྱལ་བ་མཐའ་ཡས་རྡོ་རྗེ་དང་མཇལ་འཕྲད་གནང་བས་མཚོན་པའི་ཁོང་གི་མཛད་པ་དག་ལས་གསལ་པོ་མཐོང་ཐུབ། ཅི་སྟེ་ཁོང་ཉིད་ལ་སློབ་སྡོམ་མེད་ན་ཚུལ་འཆོས་ཀྱི་རྣམ་པ་བསྟན་མི་སྲིད། ད་དུང་རྒྱུ་མཚན་གཞན་ཞིག་ནི་ཅི་སྟེ་ཁོང་ཉིད་བསླབ་སྡོམ་བཏང་ནས་ཀུན་གཟིགས་པཎ་ཆེན་རིན་པོ་ཆེ་ལྟ་བུ་སྔགས་པའི་ཆ་བྱད་གནང་ཡང་སྐུའི་དབང་ཐང་དང་མཛད་པ། གཟི་བརྗིད། དད་ལྡན་བོད་འབངས་ཀྱི་དད་པ་དག་སྣང་ལ་མཐོ་དམན་གྱི་ཁྱད་པར་ཅི་ཡང་འགྲོ་མི་སྲིད་པས་མ་ཡིན་ཡིན་མདོག་གི་ཚུལ་འཆོས་གནང་ནས་བཞུགས་དགོས་དོན་གཏན་ནས་མེད་དོ།
༧༽ གོ་ཐོས་ལྟར་ན་རྒྱ་མོ་ H ཞེས་པ་དེ་ནམ་རྒྱུན་ནས་བོད་བརྒྱུད་ནང་བསྟན་གྱི་སྐྱེས་ཆེན་ཚོ་ཐེ་ཝན་ལ་ཕེབས་པར་ངོ་རྒོལ་བའི་ཤོག་ཁག་ནང་ཞུགས་མཁན་ཡིན་རབས་འདུག་པ་མ་ཟད། བརྙན་ཐུང་ནང་རྫོང་སར་མཁྱེན་བརྩེ་རིན་པོ་ཆེ་མཆོག་དང་ཀརྨ་པ་གཉིས་བར་དམ་བསྲེས་ཐབས་ཀྱི་རྫུན་གཏམ་སྤེལ་བ། རྫོང་སར་མཁྱེན་བརྩེའི་གསལ་བཤད་ཡི་གེ་ནང་”མི་རིང་པར་མོའི་གཤིས་ཀ་དང་ངོ་གདོང་སོགས་གསལ་པོར་ཆགས་ངེས་རེད” གསུངས་པ་སོགས་གནད་དོན་ཡོངས་རྫོགས་ལ་སྡོམ་ཞིག་བརྒྱབ་ན་ནག་མོ་དེས་༧རྒྱལ་དབང་ཀརྨ་པ་མཆོག་ལ་མཚན་ཤས་བཟོ་ཆེད་འཆར་གཞི་ལྡན་པའི་ཐོག་ནས་མ་བདེན་རྫུན་སྒྲིག་གི་བརྙན་ཐུང་དེ་སྤེལ་བར་ངེས་གཏན་རེད་འདུག
མཐའ་དོན།
ནམ་རྒྱུན་ནས་རྒྱ་གཞུང་དང་དོལ་ཚོགས་སོགས་ཀྱིས་དད་ལྡན་བོད་འབངས་ཀྱི་སེམས་ཁོང་དུ་༸གོང་ས་རྒྱལ་དབང་ཡིད་བཞིན་ནོར་བུ་བསུབ་ཐབས་སུ་འདི་འདྲ་རྫུན་གཏམ་མང་པོ་སྤེལ་བཞིན་པ་ལྟར་ཐེངས་འདི་ཡང་༸རྒྱལ་དབང་ཀརྨ་པ་མཆོག་གི་མཛད་པ་འཕྲིན་ལས་རྒྱ་རིགས་ཁྲོད་བསམ་ཡུལ་འདས་པའི་ཆེས་རྒྱ་ཆེན་པོ་བསྐྱེད་བཞིན་པར་མི་བཟོད་ནས་དད་འབངས་ཚོའི་དད་འདུན་ལོག་ཐབས་སུ་རྫུན་སྒྲིག་གི་གཏམ་འཆལ་འདི་འདྲ་སྤེལ་བ་ངེས་གཏན་རེད་འདུག
དེ་བཞིན་རྫུན་མ་ནམ་ཡང་བདེན་པ་ཆགས་རྒྱུ་མེད་པས་མི་རིང་བར་བདེན་མཐའ་ཁ་གསལ་ཐོན་པར་ངེས་པས་གནས་སྐབས་རིང་དད་ལྡན་བོད་འབངས་ཚོ་བློ་བདེ་བག་ཕེབས་ངང་བཞུགས་རོགས་ཞེས་འབོད་སྐུལ་དང་བཅས།

མཆན། གོང་གི་རྩོམ་ཡིག་དེ། འབའ་པ་སྐལ་བཟང་འཕྲིན་ལས་ཀྱིས། ༢༠༡༩ /༡/༢༨ ཉིན། དྲ་ཐོག་ཏུ་སྤེལ་འདུག་པར། འདི་ག་གནམ་འོག་གི་གསར་འགྱུར་ཚན་པས་རྩོམ་པ་པོར་ཆོག་མཆན་ཞུས་ནས། འདིར་བརྒྱུད་སྤེལ་བྱས་པ་ཡིན།

བླ་མར་བཟུང་བའི་དམ་ཚིག་ནི་རང་ཉིད་ཀྱི་མདུན་ལམ་རྩ་ཆེན་ཞིག་རེད།

བསྟོད་པས་ཇེ་བཟང་མི་འགྱུར་ཞིང་།།
སྨད་པས་ཇེ་སྡུག་མི་འགྱུར་ལ།།
བླ་མ་དམ་པའི་ཡོན་ཏན་ནི།།
ས་འོག་གསེར་གྱི་ངང་ཚུལ་ལོ།།

ཁོག་པ་ནག་པོས་སྐྱོན་འདོཌ་བྱེད།།
ཁྱོད་ཀྱི་དད་པ་མི་བརྟན་ན།།
ནམ་ཞིག་རང་གི་དམ་ཚིག་ཉམས།།
བསམ་པ་ངན་པའི་དོན་འགྲུབ་འགྱུར།།

གལ་ཏེ་བླ་མར་སྨོད་པའི་ཚེ།།
རང་སར་མི་གནས་འཁྲུགས་གྱུར་ན།།
བླ་མར་བཟུང་བའི་དམ་ཚིག་ལ།།
རང་ཉིད་སུན་པ་མིན་ནམ་ཅི།།

རྒྱ་ཡིས་འཕྲུལ་གྱིས་བོད་བཅོམ་ནས།།
ཡུན་རིང་མ་སོང་ལོ་ཉུང་ཡིན།།
རྒྱ་མོ་སྨྱོན་མའི་སྨྱོ་ལབ་ལས།།
རང་གི་གནས་བབ་འདོར་མི་རུང་།།

རྒྱ་མོ་སྨྱོན་མའི་སྐད་ཆ། རྒྱ་ཡི་གསར་འགྱུར་བརྒྱུད་ལམ་ནས་ཁྱབ་སྤེལ་ཕྱིན་པ། དེང་སང་ཚན་རིག་གི་དུས་ཚོད་འདིར་སྐད་གདང་ནི་གར་སྒྱུར་སྒྱུར་ཡིན་པས། དེར་བོད་པ་ཚོ་འདྲོག་མགོ་ལང་ན་བོད་པ་རང་ཉིད་བརླག་བྱེད་གཅིག་ཡིན་པས། ངེས་པར་རང་ཚུགས་ཐུབ་པ་གྱིས། འབྲོང་བསད་པས་མི་ཚད་རྔ་མའི་དར་ཅོག།ཟེར་བའི་དཔེ་ལྟར། རྒྱ་དམར་གུང་ཁྲན་པ་དང་དེའི་རྗེས་འབྲངས་དང་བཅས་པས་བོད་ཀྱི་སྣོད་ཅུད་གཉིས་ཀ་ཧམ་བཟུང་བྱས་པའི་རྗེས། དུས་ཚོད་དང་འཁོར་ཡུག་སོགས་གནས་བབ་འདྲ་མིན་དམ་འཛིན་གྱིས། བླ་སློབ་དབར། ཆོས་བརྒྱུད་ཕན་ཚུན། ཆོལ་ཁའི་ནང་ཁུལ། ཆབ་སྲིད། འཕྲོད་བསྟེན། ལོ་རྒྱུས། བགྲོ་གླེང་། འདུ་འཛོམས། སྤྱི་ཚོགས་དྲ་ལམ་སོགས་སྡིངས་ཆ་མི་འདྲ་བའི་གོ་སྐབས་བེད་སྤྱད་དེ། འཛམ་གླིང་ས་སྒང་འདིར་བོད་ཟེར་བ་མིང་ཙམ་ཡང་མེད་པར་རྩ་མེད་བཟོ་བའི་ངན་སེམས་ཁོག་བཅངས་ཀྱིས་ལས་འགུལ་སྣ་མང་སྤེལ་བཞིན་པར། བོད་མི་ཚོས་སྤྱང་གྲུང་འཛོམས་པོ་བྱོས།
གསར་འགོད་པ། ཉག་ཆུ་སྔོན་མོས།