རྒྱ་ནག་གི་སྲིད་འཛིན་ལ་སྤྲད་པའི་ཡིག་ཆ་སྐྲག་མོ་དེ་འདི་ཡིན་ས་འགི་ལེ།
ཐེངས་ 12523 བཀླགས་འདུག
མཆན། ཐུགས་སྣང་ཞེན་སྐུལ། རྒྱ་རིགས་ཚོང་པ་ཀུའུ་ཝེན་ཀུས་ (Guo Wengui) ཡིས་བསྒྲགས་པའི་ཡིག་ཆ་གཅིག་འདིར་ཡོད། སྤྱི་ཚོགས་ནང་གླེང་རྙོག་ཡོད་པ་ལྟར་འདི་ནས་ཡིག་ཆ་དེ་༸གོང་ས་མཆོག་གི་ཕྱག་བྲིས་ངོ་མ་ཡིན་པ་ད་དུང་ཡང་ངོས་ལེན་ཞུས་མེད། ཡིག་ཆ་འདི་༸གོང་ས་མཆོག་སྐུ་ངོ་མས་བྲིས་གནང་མིན་ཇི་ལྟར་ཡང་། ཡིག་ཆའི་འགོ་བརྗོད་དང་གཤམ་དུ། ༸གོང་ས་མཆོག་སྐུ་ངོ་མས་ཕྱག་བྲིས་ཡིན་ནམ་སྙམ་པ་ལྟ་བུའི་འཁྱུག་ཡིག་ཅིག་འདུག་པ་འདིར་ཡིག་འགོད་བྱས་མེད། འོན་ཀྱང་། ཡིག་ནོར་གང་འཚམས་ཡོད་པ་དྲ་ཚིགས་འདིའི་འགན་ཁུར་བ་ལྟ་བུས་བཅོས་ཟིན་པ་ཡིན།
༄༅།། བཀུར་འོས་ཀྲུང་ཧཱ་མི་དམངས་སྤྱི་མཐུན་རྒྱལ་ཁབ་ཀྱི་གཙོ་འཛིན་ཞི་ཅིན་ཕིན་མཆོག་ལ་སྟབས་འབུལ།
ཉེ་ཆར་ཏང་གི་སྐབས་བཅོ་བརྒྱད་པའི་དབུས་འཐུས་མིའི་གྲོས་ཚོགས་ཐེངས་གསུམ་པའི་ཚོགས་འདུ་ལེཊ་གྲུབ་བྱུང་བའི་ནང་། འབྱུང་འགྱུར་དཔལ་འབྱོར་ལམ་ལུགས་ལ་གཞི་རྒྱ་ཆེ་བའི་བཅོས་བསྒྱུར་དང་། ཞིང་པའི་ཁེ་ཕན་དང་ཐོབ་ཐང་སྲུང་སྐྱོབ། ཁྲིམས་ཀྱི་དབང་བསྒྱུར་གྱི་ཆ་རྐྱེན་འཐུས་ཚང་བཟོས་ཏེ་འགྲོ་བ་མིའི་ཐོབ་ཐང་འགན་སྲུང་། ལམ་ལུགས་དང་སྡེ་ཚན་འཐུས་ཚང་བཏང་ནས་ལྐོག་ཟ་རུལ་སུངས་འགོག་རྒོལ་ལ་ཤུགས་སྣོན། སྐྱེ་ཁམས་ཁོར་ཡུག་སྲུང་སྐྱོབ་ཀྱི་ལམ་ལུགས་དང་སྒྲོམ་གཞི་གསར་འཛུགས། ཏང་གི་མི་རིགས་སྲིད་ཇུས་ལག་བསྟར་གྱིས་གྲངས་ཉུང་མི་རིགས་ཀྱི་ཁྲིམས་མཐུན་གྱི་ཁེ་དབང་སྲུང་བརྩི་དང་། འདྲ་མཉམ། མཐུན་སྒྲིལ། ཕན་ཚུན་རོགས་སྐྱོར་དང་འཆམ་མཐུན་གྱི་སྒོ་ནས་སྤྱི་ཚོགས་རིང་ལུགས་ཀྱི་མི་རིགས་འབྲེལ་བ་སྲ་བརྟན་གོང་འཕེལ་གཏོང་རྒྱུ་སོགས་འཕྲལ་ཡུན་གཉིས་དགེའི་གནད་དོན་མང་པོ་གྲོས་འཆམ་ཐག་གཅོད་བྱུང་འདུག་པར་ངོས་ནས་དགའ་སྤོབས་ཆེན་པོས་རྗེས་སུ་ཡི་རངས་བྱེད་ཀྱི་ཡོད།
ཁྱད་པར་ཉིད་ཀྱི་གསུང་བཤད་ནང་འགོ་ཁྲིད་ལས་བྱེད་རྣམས་ཀྱིས་བསམ་བློ་བཅིངས་འགྲོལ་དང་། དངོས་ཐོག་བདེན་འཚོལ་བྱེད་དགོས་གསུངས་པ་ནི། ལྐོག་ཟ་རུལ་སུངས་རྩ་འགོག་གནང་རྒྱུའི་ཆོད་སེམས་བརྟན་པོ་མཚོན་པས། དེ་ལ་ཤེས་ལྡན་ཀུན་གྱིས་ཡི་རངས་ཞུ་བས་ངོས་ནས་ཀྱང་ཡོངས་བསྒྲགས་སུ་བསྔགས་བརྗོད་བྱེད་བཞིན་ཡོད།
ངོས་ནས་རྒྱུན་དུ་རྒྱ་ནག་ནི་མི་ལོ་སྟོང་ཕྲག་མང་པོའི་ལོ་རྒྱུས་ལྡན་ཞིང་། རིག་གནས་ཕུན་སུམ་ཚོགས་པ་དང་། རྒྱལ་སྤྱིིའི་ནང་མི་འབོར་མང་ཤོས་ཀྱི་རྒྱལ་ཁབ་ཆེན་པོ་ཞིག་ཡིན་པས། འཛམ་གླིང་ཡོངས་ལ་ཞབས་འདེགས་ཀྱི་མཛད་རྗེས་འཇོག་པའི་ནུས་པ་ཡོད་ཅེས་བརྗོད་བཞིན་པ་ལྟར། དེ་རིང་གོ་སྐབས་འདིར་བསྐྱར་བརྗོད་བྱ་འདོད་བྱུང་། འོན་ཀྱང་དེ་འདྲའི་མཛད་རྗེས་འཇོག་པ་ལ་རྒྱལ་སྤྱིའི་སྤྱི་ཚོགས་ཀྱིས་ཡིད་ཆེས་དང་བརྩི་བཀུར་ཐོབ་དགོས་ཤིང་། ལྷག་པར་ཁྱིམ་མཚེས་རྒྱལ་ཁབ་ཁག་དང་ཕན་ཚུན་ཡིད་ཆེས་ཡོད་པའི་མཛའ་འབྲེལ་དམ་ཟབ་དགོས་གལ་ཤིན་ཏུ་ཆེ་སྙམ། དེ་ལྟར་བྱུང་ན་རྒྱ་ནག་གི་མཚན་མཐོང་དང་ནུས་པ་ཧ་ཅང་ཆེ་རུ་འགྲོ་རྒྱུ་སྨོས་མེད་ཡིན།
ཉིད་ཀྱིས་མཁྱེན་གསལ་ལྟར། ངོས་ནས་ཕྱི་ལོ་ ༢༠༡༡ ལོར་ཆབ་སྲིད་ཀྱི་འགན་དབང་ཡོངས་རྫོགས་རྩིས་སྤྲོན་ཟིན་ཏེ་ད་ཆ་བོད་མི་དཀྱུས་མའི་ངོ་བོར་གནས་མོད། ཏཱ་ལའི་བླ་མའི་མཚན་གནས་རྗེས་འབྲེལ་གྱིས་ཆོས་ཕྱོགས་ནས་དད་གུས་དང་བརྩི་བཀུར། ཡིད་ཆེས་དང་རེ་བ་བྱེད་མཁན་མང་པོ་ཡོད་སྟབས། ལས་སྨོན་དང་འབྲེལ་བའི་ཁུར་འགན་གཡོལ་ཐབས་མེད་པ་ཞིག་ཡོད། གཞན་ཡང་ད་ལོར་ས་གནས་ཁ་ཤས་སུ་སྐུ་ཉིད་དང་ཐུགས་འདྲིས་ཡོད་པའི་མི་སྣ་རེ་ཟུང་དང་ཐུག་འཕྲད་སྐབས། དོན་གནད་འགའ་རེའི་སྐོར་ངོས་ཀྱི་བསམ་ཚུལ་ཐད་བརྗོད་དགོས་གལ་ཡོད་པའི་དགོངས་འཆར་བྱུང་དོན་བཞིན། བོད་ཀྱི་གནད་དོན་དང་འབྲེལ་བའི་ཚིག་ཁ་ཤས་ཞུ་རྒྱུ་ཡིན།
ང་ཚོས་རྒྱུན་རིང་བསམ་ཞིབ་གྲོས་བསྡུར་བྱས་འབྲས་སུ། བོད་ལ་འཕགས་ཡུལ་ནཱ་ལེནྡྲ་ནས་བརྒྱུད་པའི་ནང་པའི་ལྟ་གྲུབ་ཀྱིས་མཚོན་པའི་ནང་བསམ་བློའི་རིག་གཞུང་ཧ་ཅང་ཕྱུག་པོ་ཡོད་ན་ཡང་། ཕྱི་ཡི་དངོས་པོའི་གནས་སྟངས་ཤིན་ཏུ་རྗེས་ལུས་ཡིན་པས། ཕྱོགས་ཡོངས་དང་ཕུགས་རྒྱང་རིང་པོའི་དགེ་མཚན་གྱི་ངོས་ནས་བལྟས་ན། བོད་རང་བཙན་རྩོད་རྒྱུ་ད་ལྟའི་དངོས་དོན་དང་མི་མཐུན་པ་མཐོང་བ་དང་། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་ནང་རང་སྐྱོང་མིང་དོན་མཚུངས་པ་ཞིག་ཡོང་ཐབས་ཁེ་ཕན་ཆེ་བས་དེ་དོན་བྱ་རྒྱུའི་ཐག་གཅོད་ཕྱི་ལོ་ ༡༩༧༤ ལོ་ནས་བྱས་ཟིན་པ་དང་། ཕྱི་ལོ་ ༡༩༧༩ ལོར་སྐབས་དེའི་རྒྱ་ནག་གི་དབུ་ཁྲིད་སྐུ་ཞབས་ཏེང་ཞའོ་ཕིང་གིས་ངོས་ཀྱི་གཅེན་པོ་རྒྱ་ལོ་དོན་གྲུབ་བརྒྱུད་བོད་རང་བཙན་མ་བཤད་ན། དེ་མིན་གྱི་གནད་དོན་ཡོངས་རྫོགས་གྲོས་མོལ་གྱི་ལམ་ནས་ཐག་གཅོད་ཆོག་རྒྱུ་གསུངས་པ་ལྟར། ངོས་ནས་གཉིས་སྨན་དབུ་མའི་ལམ་གྱི་བསམ་ཚུལ་སྐབས་དེ་ནས་ཡོངས་གྲགས་གསལ་སྟོན་བྱས་པ་ཡིན། དེ་ནས་བཟུང་ཕྱི་ལོ་ ༢༠༡༠ ལོ་འགོ་བར་མི་ལོ་སུམ་ཅུ་ལྷག་རིང་རྒྱ་ནག་དབུས་གཞུང་གི་འབྲེལ་ཡོད་དཔོན་རིགས་ཁག་དང་། ངོས་ཀྱི་ངོ་ཚབ་ཚོའི་བར་ཐུག་འབྲེལ་གོ་བསྡུར་ཐེངས་མང་བྱུང་འབྲས་སུ་དབུ་མའི་ལམ་གྱི་དགོས་འདུན་ལ་ལེགས་བཅོས་རིམ་སོང་གི་ཡོངས་བསྒྲགས་ཡིག་ཆ་ཁག་མང་པོ་ཡོད་ཐོག མཐའ་དོན་ངོས་ཀྱི་མངོན་འདོད་ཡོངས་རྫོགས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་དང་། མི་རིགས་ས་གནས་རང་སྐྱོང་གི་བཅའ་ཁྲིམས་ཀྱི་ཆ་རྐྱེན་ཁག་ཁོ་ནའི་འོག་ཚུད་པ་བྱས་ཏེ་དབུ་མའི་ལམ་གྱི་མངོན་འདོད་ཀྱི་འགྲེལ་བརྗོད་རྗེས་ཤོས་ ༼བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་བསམ་འཆར་༽ ཞེས་པ་དང་། བསམ་འཆར་དེའི་འགྲེལ་བརྗོད་ཡིག་ཆ་གཉིས་ནང་ཞིབ་ཕྲ་གསལ་ཡོད། དེ་གསལ་དོན་གནད་ཁ་ཤས་ནན་བརྗོད་བྱ་རྒྱུ་གཤམ་གསལ།
ཀ༽ “བོད་ཆེན་པོ་” ཞེས་པའི་ཐ་སྙད་ནི་ང་ཚོས་ནམ་ཡང་བེད་སྤྱོད་བྱས་མེད་ཅིང་། དེ་བཞིན་” ཚད་མཐོའི་རང་སྐྱོང་” ཞེས་པའི་ཐ་སྙད་ཀྱང་བྱེད་སྤྱོད་བྱེད་ཀྱི་མེད་ལ། དེ་འདྲའི་དགོས་འདུན་ཡང་བཏོན་མྱོང་མེད། ངོས་ཀྱི་རེ་འདུན་ནི། བོད་རིགས་གནས་ཡུལ་ས་གནས་ཡོངས་ལ་བོད་རིགས་ཚང་མར་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་དང་། མི་རིགས་ས་གནས་རང་སྐྱོང་གི་བཅའ་ཁྲིམས་ཀྱི་ཆ་རྐྱེན་ཁག་གཞིར་བཟུང་ཆོས་དང་རིག་གཞུང་། སྐད་ཡིག ཤེས་ཡོན། འཕྲོད་བསྟེན། ཁོར་ཡུག་སྲུང་སྐྱོབ་སོགས་ཀྱི་རང་སྐྱོང་གི་གནས་བབ་གཅིག་གྱུར་དགོས་རྒྱུ་དེ་རང་ཡིན། རྒྱ་ནག་མི་དམངས་སྤྱི་མཐུན་རྒྱལ་ཁག་ནང་གྲངས་ཉུང་མི་རིགས་ ༥༥ ཡོད་པ་ནས་བོད་རིགས་ནི་མི་རིགས་གཅིག་རང་ཡིན་པ་ལས། བོད་ཆེ་ཆུང་གི་དབྱེ་བ་ཕྱེ་རྒྱུ་མེད་པར་མཐོང་གི་ཡོད། དེ་བཞིན་རྩ་ཁྲིམས་དང་བཅའ་ཁྲིམས་སུ་གསལ་བའི་རང་སྐྱོང་གི་ཆ་རྐྱེན་ནང་དུའང་རང་སྐྱོང་ཚད་མཐོ་དམན་གྱི་རྣམ་དབྱེ་མེད།
ཁ༽ རེ་འགས་དབུ་མའི་ལམ་ནི་བོད་རང་བཙན་གྱི་གོམ་པ་དང་པོ་ཡིན་ཚུལ་བརྗོད་པ་ནི་གཞི་མེད་ཀྱི་བསྙོན་འཛུགས་ཁོ་ན་ཡིན། ངོས་ནས་ལྷག་བསམ་རྣམ་དག་དང་ཁ་ཞེ་གཉིས་མེད་ཀྱིས་དབུ་མའི་ལམ་གྱི་ལངས་ཕྱོགས་འགྱུར་མེད་དམ་འཛིན་གྱིས། བོད་མིའི་མངོན་འདོད་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ཀྱི་སྒྲོམ་གཞི་རང་གི་ནང་ནས་འཚོལ་རྒྱུའི་ཆོད་སེམས་བརྟན་བཟུང་ཡོད་མུས་ལྟར། འབྱུང་འགྱུར་ཡང་དེ་དོན་སོར་གནས་བྱ་རྒྱུ་ལོས་ཡིན།
ག༽ ཡང་ཁ་ཅིག་གིས་བོད་ཀྱི་ས་ཁོངས་ནས་རྒྱ་རིགས་ཡོངས་རྫོགས་ཕྱིར་འབུད་གཏོང་རྩིས་ཡོད་ཚུལ་བརྗོད་པའང་གཞི་མེད་ཀྱི་དཀྲོགས་གཏམ་འབའ་ཞིག་ལས་མ་འདས། བོད་མི་རྣམས་རང་ཡུལ་དུ་ཆེས་གྲངས་ཉུང་དུ་གྱུར་ན་ཆོས་རིག་སྐད་ཡིག་ཡུལ་གོམས་སོགས་སྲུང་སྐྱོབ་དང་། ལྷག་པར་ཁོར་ཡུག་ལ་དོ་ཕོག་ཆེན་པོ་ཡོང་རྒྱུའི་སེམས་འཚབ་ཡོད་པ་དངོས་འབྲེལ་ཡང་། སྔོན་ནས་གཞིས་ཆགས་ཟིན་པའི་བོད་རིཊ་མིན་པ་ཕྱིར་འབུད་གཏོང་རྒྱུའི་དམིགས་ཡུལ་གཏན་ནས་མེད་སྐོར་བསམ་འཆར་ཡིག་ཆ་དངོས་དང་། རྒྱལ་སྤྱིའི་སྡིངས་ཆའི་ཐོག་ངོས་ཀྱི་ཡོངས་བསྒྲགས་གཏམ་བཤད་ཁག་གི་ནང་ཡང་ཡང་ནན་བརྗོད་ཟིན་པ་ཀུན་གྱིས་མཁྱེན་གསལ་ཡིན།
ཡང་ཏཱ་ལའི་བླ་མའི་ཡང་སྲིད་སྐོར། ངོས་ནས་ཕྱི་ལོ་ ༡༩༦༩ ལོར་ཏཱ་ལའི་བླ་མའི་སྐུ་ཕྲེང་རྒྱུན་གནས་དགོས་མིན་འབྱུང་འགྱུར་བོད་རིགས་མི་མང་གིས་ཐག་གཅོད་དགོས་པའི་ཡོངས་ཁྱབ་གསལ་བསྒྲགས་ཟིན་པ་ལྟར། ཕྱི་ལོ་ ༢༠༡༡ ལོར་བོད་ཀྱི་ཆོས་རྒྱུད་ཁག་དང་གཡུང་དྲུང་བོན་བཅས་ཀྱི་དབུ་ཁྲིད་བླ་ཆེན་ལྷན་འཛོམས་ཐོག་སྤྱི་མོས་གྲོས་འཆམ་བྱུང་བའི་གསལ་བསྒྲགས་ནང་། “ངོས་རང་རྗེ་དགེ་འདུན་གྲུབ་ཀྱི་དགུང་གྲངས་ཙམ་དུ་སོན་སྐབས་ཆོས་རྒྱུད་བླ་ཆེན་ཁག་དང་། བོད་མིས་མཚོན་འབྲེལ་ཡོད་དད་ལྡན་མང་ཚོཊ་ལ་གོ་བསྡུར་གྱིས་རྒྱལ་དབང་སྐུ་ཕྲེང་རྒྱུན་མཐུད་དགོས་མིན་བསྐྱར་ཞིབ་དང་ཐག་གཅོད་བྱེད་འཆར་ཡིན་ “ཞེས་གསལ་བ་བཞིན། སྐབས་དེར་ཡང་སྲིད་དགོས་པ་ཤར་ཚེ་ངོས་འཛིན་བྱེད་ཕྱོགས་ཆོས་ལུགས་ཀྱི་ལམ་སྲོལ་ལྟར་ལས་སྲིད་དོན་དང་མ་འབྲེལ་བ་དགོས་ངེས།
གཞན་ཡང་བར་ལམ་བོད་མི་ན་གཞོན་མང་པོས་རང་ལུས་མེར་བསྲེགས་བཏང་བ་དེ་ནི་བློ་ཕམ་དང་སེམས་འཚབ་སྐྱེ་གཞི་ཞིག་ཡིན་སྟབས། ཡིད་སྐྱོའི་གནས་ཚུལ་དེ་བྱུང་མ་ཐག་ངོས་ནས་གསར་འགྱུར་རྒྱུད་ལམ་ཁག་ཏུ་བྱེད་ཐབས་དེ་ལ་མོས་མཐུན་དང་རྒྱབ་སྐྱོར་མེད་པ་གསལ་སྟོན་བྱས་པ་དང་ཆབས་ཅིག གནད་དོན་དེའི་འབྱུང་རྐྱེན་གང་ཡིན་དྲང་བདེན་རྩད་གཅོད་ཀྱིས་སེལ་ཐབས་བྱེད་དགོས་པའི་འབོད་སྐུལ་བྱས་པ་ཡིན།
མདོར་ན། དུས་རབས་ཕྱེད་ལྷག་འགོར་འགྱངས་ཕྱིན་པའི་བོད་ཀྱི་དཀའ་རྙོག་བདེ་བླག་ངང་སེལ་ཐུབ་པ་བྱུང་ན། མི་རིགས་མཐུན་སྒྲིལ་དང་རྒྱལ་ཁབ་བརྟན་ལྷིང་ལ་ཕན་ཐོགས་ཆེན་པོ་ཡོད་པ་མ་ཚད། རྒྱལ་སྤྱིའི་ཐོག་རྒྱ་ནག་གི་མཚན་མཐོང་ལ་རྒྱ་ཆེ་རུ་འགྲོ་བར་ཡང་དགེ་མཚན་ཆེན་པོ་ཡོད་སྟབས། ངོས་ནས་ལྷག་བསམ་ཟོལ་མེད་ཀྱིས་སྐུ་ཉིད་ཀྱིས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་དབུ་ཁྲིད་གནང་བའི་དུས་རིམ་ནང་། རྣམ་དཔྱོད་དང་ནུས་པ་ཟུང་འབྲེལ་ཐོག་གནད་དོན་དངོས་ཡོད་ལ་གདོང་གཏུགས་ཏེ་ང་ཚོ་ཐུན་མོང་གིས་མཉམ་རུབ་བརྒྱུད་བོད་ཀྱི་དཀའ་རྙོག་སེལ་ཐུབ་པའི་རེ་བ་བྱེད་བཞིན་ཡོད།
བོད་ཀྱི་ཤཱཀྱའི་དགེ་སློང་ཏཱ་ལའི་བླ་མ་སྐྱེ་ཕྲེང་བཅུ་བཞི་པས། ཕྱི་ལོ་ ༢༠༡༣ ལོའི་ཟླ་བ་ ༡༢ ཚེས་ ༢༥ ལ་རྒྱ་གར་ནས་ཕུལ།
